Qazaqstannyń ǵylymı áleýeti qalpyna keldi me

<p>Ǵylym jáne joǵary bilim mınıstri Saıasat Nurbek 90-jyldary Qazaqstannyń áleýetine úlken soqqy bolǵanyn aıtty, dep habarlaıdy QazAqparat tilshisi.</p>

«90-jyldary ǵylymı áleýetimizge úlken soqqy keldi. 1990 jyly bizde ǵylymı-zertteý ınstıtýttarynyń 52 000 qyzmetkeri men ǵylymmen aınalysqan professorlyq-oqytýshylyq quramy resmı túrde tirkelgen. 2000 jyly nemese 10 jyldan keıin 12 myńy qaldy. Naqty aıtqanda, 35 myńnan astam adamdy joǵalttyq», - dedi S. Nurbek Senatta tilshiler suraǵyna jaýap bere otyryp.

Bul turǵyda mınıstr kezinde ǵylymmen aınalysqan bul adamdardyń keıbiri shetelge ketse, birazy kásipkerlikke nemese memlekettik qyzmetke barǵanyn aıtty.

«Qazir birtindep ǵylymı áleýetimizdi qalpyna keltirip jatyrmyz. Qazir elimizdegi 22 myń ǵylymı qyzmetker jumys istep jatyr. Osy oraıda ǵylymı daıarlaý aıasynda granttar sany ósedi. Jas ǵalymdardy qoldaýǵa erekshe nazar aýdarylyp otyr», - dedi vedomstvo basshysy.

Budan buryn habarlanǵandaı, Búgin Senatta Qazaqstannyń ornyqty damý salasyndaǵy ulttyq maqsattar men mindetterdi iske asyrý monıtorıngi jónindegi Parlamenttik komıssııa otyrysy boldy.

Onda Saıasat Nurbek «Keleshek» baǵdarlamasyn júzege asyrýǵa qatysty túsinik berdi.