Qazaqstannyń energetıka júıesi Reseıge táýeldi bolyp qalmaı ma – Energetıka mınıstriniń jaýaby

<p>ASTANA. KAZINFORM &ndash; &laquo;Rosatomnyń&raquo; Qazaqstanda AES salýy múmkin kompanııalardyń tiziminde bolýy Astanany Máskeýge energetıkalyq turǵydan táýeldi ete túspeı me? Energetıka mınıstri Almasadam Sátqalıevke Astana turǵyndarymen kezdesý aldynda ótken baspasóz máslıhatynda osyndaı suraq qoıyldy.</p>

«Biz qandaı bir elge táýeldimiz nemese táýeldi emespiz dep aıtpaımyz. Ózara qýat almasý arnalary bar ekeni túsinikti. Eki arada kommertsııalyq turǵydan negizdi bolyp esepteletin ózara energııa tasymaly bar. Ózara rezervteýmen baılanysty rejım júıeleri bar. Qazir Qazaqstan ǵana emes, barlyq elder óz energetıkalyq júıesiniń táýelsizdigine, júktemeni ózindegi qýat kózderimen jabýǵa, qajet bolǵan jaǵdaıda avtonomdy rejımde jumys isteý múmkindigine basymdyq beredi. ıAǵnı, bul bizdiń josparlaý jumysymyzdyń bir elementi. Sondyqtan da biz Qazaqstan aýmaǵynda aýqymdy túrde qýat kózderin iske qosyp jatyrmyz», - dedi Almasadam Sátqalıev.

Sondaı-aq, ol munaı eksportynda da bir ǵana marshrýtqa táýeldilikten arylý joldary paıda bolyp kele jatqanyn aıtty.

«Munaı tasymalyna kelsek, bizde Reseı aýmaǵynan bólek Qytaıǵa eksporttaý múmkindigi bar. Transkaspıı kólik marshrýtyn damytý baǵytynda úlken jumystar atqardyq. Bizde Ázerbaıjan tarabymen «Baký-Sýpsa» eksporttyq munaı qubyryna paıdalaný boıynsha kelisim bar. «Tbılısı-Jeıhan» baǵytymen munaı jetkizýdi qazirdiń ózinde bastap kettik. Temirjol arqyly Soltústik-Ońtústik dálizi arqyly munaı tasymaldaý múmkindigi bar. Biz balama joldardy kórip otyrmyz jáne siz kótergen máseleni nazarda myqtap ustap otyrmyz», - dedi Energetıka mınıstri.