Qazaqstannyń adam quqyqtaryn iske asyrý salasyndaǵy saıasaty BUU-da usynyldy

<p>ASTANA. KAZINFORM - Qazaqstannyń Turaqty ókildigi Qyrǵyzstan, Tájikstan, Túrikmenstan jáne Ózbekstan dıpmıssııalarymen jáne BUU Adam quqyqtary jónindegi Joǵarǵy komıssary basqarmasymen birlesip, Jenevada ótip jatqan BUU Adam quqyqtary jónindegi keńesi 57-shi sessııasynyń aıasynda &laquo;Damý quqyǵy kontekstindegi adam quqyqtary&raquo; taqyrybynda arnaıy is-shara ótkizdi. Bul týraly Syrtqy ister mınıstrligi málimdedi.</p>

Іs-sharaǵa qatysýshylar óz baıandamalarynda jáne talqylaý barysynda adamnyń barlyq quqyqtary men negizgi bostandyqtaryn júzege asyrý úshin damý quqyǵynyń aınymas mańyzyn, onyń ishinde el úkimetteriniń damý saıasatyn ázirleý men júzege asyrýdaǵy jaýapkershiligin atap ótti. 

Foto: QR SІM

Qazaqstannyń Turaqty ókili Erlan Álimbaev óz sózinde qatysýshylardy 2019-2021 jyldary elimizde sátti júzege asyrylǵan saıası reformalardyń tórt keshendi toptamasynyń nátıjeleri týraly habardar etip, Memleket basshysynyń jýyrdaǵy Joldaýynda belgilengen ekonomıkalyq reformalardyń jáne ekonomıkany odan ári monopolııasyzdandyrý men ártaraptandyrýdy qosa alǵandaǵy jańa ekonomıkalyq modelge kóshý josparlaryna keńinen toqtaldy.

Atap aıtqanda, qazaq dıplomaty shaǵyn jáne orta bıznesti qoldaý, salyq zańnamasyn ońaılatý, 2029 jylǵa qaraı 3,3 mıllıonnan astam adamdy jumyspen qamtý, 450 myń jańa jumys ornyn qurý, onyń ishinde jastar úshin 200 myń (44%) oryndy bólý, sondaı-aq elimizdegi balalarǵa arnalǵan Ulttyq qor boıynsha qabyldanǵan sharalarmen bólisti.

Sonymen qatar, Qazaqstannyń Turaqty ókili búkil Ortalyq Azııa aımaǵynda ornyqty damýdyń keshendi strategııasyn ázirleýde jáne turaqtylyq pen ómirsheńdikti nyǵaıtýda óńirlik kózqarastaǵy tásildemeniń mańyzdy rólin atap ótti.