Qazaqstannyń 400-den astam mektebinde ashana joq
O. Bektenov qabyldanyp jatqan sharalarǵa qaramastan, balalardy tamaqtandyrý sapasy ózekti másele bolyp qalǵanyn jáne qaıta qaraýdy qajet etetinin aıtty.
«Oqý-aǵartý jáne Densaýlyq saqtaý mınıstrlikteri tarapynan úılestirý men baqylaý álsiz ekenin atap ótemin. Men barlyq mektep ashanalaryna sanıtarııalyq-epıdemıologııalyq talaptarǵa sáıkestigi turǵysynan monıtorıng júrgizýdi, sondaı-aq personaldyń jumys isteýge ruqsaty bar-joǵyn, jaramdylyq merzimderi men tamaq ónimderin saqtaý sharttarynyń saqtalýyn tekserýdi tapsyrǵan bolatynmyn. Densaýlyq saqtaý mınıstrligi tarapynan tapsyrmany oryndaý sozylyp ketti», - dedi O. Bektenov Úkimettiń búgingi otyrysynda.
Onyń aıtýynsha, ákimdikter mektep ashanalaryn jańǵyrtý jáne jaraqtandyrý boıynsha tıisti jumys júrgizbeıdi.
«Búgingi tańda 403 mektepte ashana joq, sondyqtan onda balalar ystyq tamaqpen tolyqqandy qamtamasyz etilmegen. Mekteptegi, ásirese shaǵyn jáne shalǵaıdaǵy mektepterde qaýipsiz tamaqtanýdy uıymdastyrý máselesinde tolyq tártip ornatý qajet. Tamaqtaný sapasyn jaqsartý jáne jetkizýshiler jaýapkershiligin arttyrý boıynsha naqty sharalar qabyldaǵan jón», - dedi Premer-Mınıstr.
Oqý-aǵartý jáne Densaýlyq saqtaý mınıstrlikterine sarapshylar men ǵalymdardy tarta otyryp, jyl sońyna deıin úlgilik perspektıvalyq mázirdi qamtıtyn, onyń ishinde ashanasy joq mektepterge arnalǵan Tamaqtaný standartyn qabyldaý tapsyryldy.
Buǵan deıin Memleket basshysy Qasym-Jomart Toqaev aýyl sharýashylyǵy qyzmetkerleriniń birinshi forýmynda mektep ashanasyndaǵy tamaq sapasyn arttyrý baǵytyndaǵy ustanymdaryn aıtqan edi.
El mektepterinde 1,7 mln bala tegin ystyq tamaqpen qamtylǵan.