Qazaqstannyń 17 mıllıonynshy turǵyny Altynbek 10 jasqa toldy

<p>Qazaqstannyń 17 mıllıonynshy turǵyny Altynbek Esqara 10 jasqa toldy, dep habarlaıdy <a href="Kazinform" target="_blank" rel="noopener">Kazinform.</a></p>

Altynbek búginde Shymkent qalasyndaǵy Orazbaı atyndaǵy № 115 mekteptiń besinshi synybynda oqyp júr. Mektebindegi úzdik oqýshylardyń biri ol pánaralyq saıystar men sporttyq jarystarǵa únemi qatysady. Onyń bolashaq armany — óskende dáriger bolý. 

«Qýanyshty habardy estip qýanyp otyrmyn. Artymnan ergen 20 mıllıonynshy qazaqstandyqty shyn júrekten quttyqtaımyn. Elin súıgen azamat bolyp óse bersin» — degen tilegin jetkizdi ol. 

Foto: Gúlmıra Saparbaevanyń jeke muraǵatynan

Altynbektiń ákesi Murat mal sharýashylyǵymen aınalysady. Al, anasy Gúlmıra aǵylshyn tilinen sabaq beredi. 

«Búgin Qazaqstannyń 20 mıllıonynshy turǵyny dúnıege kelipti. Barshamyz qýanyp jatyrmyz. Meniń Altynbegim ómirge kelgen sátinde de dál osylaı el bolyp qýanǵan edik. Búldirshinniń baýy berik bolsyn. Ata-anasynyń qýynyshyn jaqsy túsinemin. Altynbegim 10 jasqa toldy. Úlgili aqyldy bolyp ósip keledi», — dedi Gúlmıra Saparbaeva. 

Foto: Gúlmıra Saparbaevanyń jeke muraǵatynan

Qazir Murat pen Gúlmıranyń otbasynda 5 bala bar. Altynbekten soń, Aıbek esimdi sábı dúnıege kelgen. Onyń jasy 2-den asty. Odan bólek, Nurbek, Jánibek, Asylbek esimdi el qorǵaıtyn jigitter ósip keledi. 

«Bári de baýyrmal, bir-birine qamqor. Biriniń sońynan biri ósip keledi. Elimizdiń demografııasynyń ósýine úles qosyp jatqanymyzdy maqtan tutamyn», — deıdi Altynbektiń anasy.