Qazaqstannan Japonııaǵa qatynaıtyn ushaqtar qaı qalalarǵa aparady

ASTANA. QazAqparat - Qazaqstannan Japonııaǵa tikeleı reısti bıyl ashý boıynsha jumystar júrgizilip jatyr. Bul týraly QR Indýstrııa jáne ınfraqurylymdyq damý mınıstrliginiń Azamattyq avıatsııa komıteti málim etti, dep habarlaıdy QazAqparat tilshisi.

«Qazaqstan men Japonııa arasynda turaqty áýe qatynasyn uıymdastyrý úshin qajetti quqyqtyq negizdemelerdi Azamattyq avıatsııa komıteti 2016 jyly qalyptastyrǵan. Bul Qazaqstan men Japonııa áýe kompanııalaryna ár taraptan esh shekteýsiz aptasyna 14 ret turaqty reıs oryndaýǵa quqyq beredi», - delingen komıtettiń habarlamasynda.

Komıtetten habarlanǵandaı, qazaqstandyq áýe tasymaldaýshylary úshin jetý pýnkti - Tokıo, Osaka, Nagoıa qalalary bolsa, japondyq áýe kompanııalary úshin Astana, Almaty jáne Qaraǵandy qalalary bolmaq.

«Aıta ketý kerek, buryn elder arasynda Qazaqstannan Tokıoǵa ushatyn eshqandaı quqyqtyq negiz bolǵan joq. Qazirgi ýaqytta áýe kompanııalarymen birigip, Japonııaǵa tikeleı reıs ashý boıynsha jumystar júrgizilip jatyr», - delingen komıtettiń habarlamasynda.

Eske sala ketsek, búgin Elbasy Nursultan Nazarbaev Úkimettiń keńeıtilgen otyrysynda Indýstrııa jáne ınfraqurylymdyq damý mınıstri Jeńis Qasymbekke Amerıka Qurama Shtattary men Japonııaǵa tikeleı áýe reısin ashý máselesi bıyl sheshilýi kerektigin tapsyrǵan bolatyn.