Qazaqstannan Vetnamǵa saparlaǵan adamdardyń sany kúrt ósti
Kelisimge Hanoı qalasynda 2023 jylǵy 21 tamyzda qol qoıyldy. Shart Qazaqstan Respýblıkasy men Vetnam Sotsıalıstik Respýblıkasy arasyndaǵy bas bostandyǵynan aıyrýǵa sottalǵan adamdardy óziniń azamattyǵy tıesili memlekette jazasyn óteý úshin berý máseleleri jónindegi qatynastardy retteýge baǵyttalǵan. Zańdy qabyldaý Vetnam aýmaǵynda Qazaqstan azamattarynyń quqyqtary men múddeleriniń saqtalýyna, jasalǵan quqyq buzýshylyq úshin jazasyn óteý ornyn tańdaýǵa yqpal etetin bolady.
«Sharttyń talaptaryna toqtalsaq, sottalǵan adam eki eldiń biriniń azamat bolýy tıis jáne óz erkimen elge qaıtarý týraly kelisimi kerek. Qujat eki el arasynda saýda-ekonomıkalyq, kásipkerlik, týrıstik jáne basqa da qarym-qatynastardyń damýyn eskere otyryp jasaldy. Máselen, 2020 jyly 1 myńǵa jýyq Qazaqstan azamaty Vetnamǵa barsa, al 2024 jyldyń 9 aıynda bul elge saparlaǵan adamdardyń sany 106 myńǵa deıin ósken. Elimizdiń azamattarynyń quqyǵyn barynsha qorǵaý mańyzyn eskere otyryp, atalǵan zańdy qabyldaýdy suraımyz», - dedi QR Bas prokýrorynyń orynbasary Ǵalymjan Qoıgeldıev.
Májilistiń Zańnama jáne sot-quqyqtyq reforma komıtetiniń málimetine qaraǵanda, Qazaqstan Respýblıkasy 23 elmen – Ázerbaıjan, Ýkraına, Túrikmenstan, QHR, Ispanııa, Túrkııa, Italııa, Majarstan, Rýmynııa, Úndistan, Iran, Serbııa, Saýd Arabııasy, Lıtva, Iordanııa, Mońǵolııa, Brazılııa, BAÁ, Koreıa Respýblıkasy, Bolgarııa, Soltústik Makedonııa, Ózbekstan, Kıprmen osyndaı sharttar jasasty.
Buǵan deıin Májilis depýtaty Nursultan Báıtilesov bul kelisim qylmys jasaǵany úshin sottalǵan eki eldiń azamattaryna jazasyn óz elinde óteýge múmkindik beretinin aıtqan bolatyn. Demek, sottalǵandardy ońaltýǵa jáne óz ultynyń qoǵamyna beıimdelýi úshin qolaıly jaǵdaı týǵyzady.