Qazaqstannan shyǵarylǵan akkýmýlıatorlar 9 elge eksporttalýda

NUR-SULTAN. QazAqparat – QR Indýstrııa jáne ınfraqurylymdyq damý mınıstri Beıbit Atamqulov otandyq akkýmýlıatorlarǵa suranys joǵary ekenin aıtty, dep habarlaıdy QazAqparat tilshisi.

«Ekinshi ındýstrııalyq besjyldyq kezeńinde mashına jasaýda ónim kólemi 1,2 esege ósti. Mashına jasaýda avtoónerkásip úlesi 26 paıyzǵa deıin artty. Osy rette shaǵyrylǵan avtomobılder tizbesi keńeıtildi. Atap aıtqanda, salada ónimderdiń jańa túrleri ıgerildi. Olardyń arasynda aqparattyq-kommýnıkatsııalyq jabdyqtar, modemder, burandaly nasostar, jaryqtandyrý qurylǵylary, ortalyq kondıtsıonerleri jáne basqa da ónimder bar», - dedi mınıstr Memleket basshysy Qasym-Jomart Toqaevtyń qatysýymen ótken «Altyn sapa» syılyǵyn tabystaý rásimine arnalǵan jıynda.

B. Atamqulovtyń sózine qaraǵanda, eksportqa negizdelgen tońazytqysh vagondardy shyǵarý retke keltirilgen.

«Biz Ortalyq Azııada alǵash bolyp asa qýatty transformatorlar óndirisin ıgerdik. Indýstrııalandyrý baǵdarlamasynyń múmkindikterin iske asyrýdyń jarqyn úlgisi retinde «Qaınar-AKB» AQ bolyp otyr. Bizdiń akkýmýlıatorlar eksporty 9 eldi qamtýda. Sonymen qatar, hımııalyq ónerkásip, farmatsevtıkalyq ındýstrııa, jeńil ónerkásip senimdi qarqynmen ilgerilep keledi», - dedi mınıstr.

Aıta keteıik, Memleket basshysy «Altyn sapa» men «Paryz» baıqaýlarynyń úzdikterin marapattady.