Qazaqstannan shyqqan gýmanıtarlyq reıs Aýǵanstannyń Gerat aımaǵyna qondy

<p>Qazaqstan halqynyń atynan Aýǵanstannyń batysyndaǵy zilzaladan zardap shekken halyqqa gýmanıtarlyq kómektiń alǵashqy legin ákelgen arnaıy ushaq Gerat áýejaıyna qondy, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi Esimjan Naqtybaı.</p>

Foto: Foto: Kazinform

Gýmanıtarlyq júkti Aýǵanstan azamattyq áýejaılar departamentiniń bas dırektory - zilzala saldarymen kúres shtabynyń múshesi Gavral Abdýl Sattar bastaǵan top qabyldap aldy. Shtab múshesi Qazaqstan Iran men Túrkııadan keıin úshinshi bolyp kómek jetkizgenin aıtady.

«Birinshiden, osynaý qıyn kúnde kómek qolyn soǵan dos peıildi Qazaqstannyń halqyna, Prezıdent Qasym-Jomart Toqaev myrzaǵa alǵys aıtamyz. Júkti qabyldap alǵannan keıin arnaıy komıssııa ony qaıda jóneltetinin keńesip sheshedi. Qazir qaıtys bolǵan adamdardy jerlep, zardap shekkenderge alǵashqy kómek kórsetip úlgerdik. Taǵy zardap shekkender anyqtalsa, oǵan da daıyn otyrmyz. Óıtkeni, búgin saǵat 5.00 kezinde qazaqstandyq qutqarýshylar jumys istep jatqan aýmaqta taǵy jer silkindi. Taǵy da Qazaqstan halqyna osyndaı qıyn kezde kómek jiberip jatqany úshin rahmet aıtamyz», - deıdi shtab ókili.

Buǵan deıin habarlaǵanymyzdaı, Ulttyq ulannyń Y8F200W ushaǵyna Astana, Almaty, Shymkent qalalarynan 1200 adam panalaıtyn 70 shatyr, jalpy salmaǵy 6 tonnadan asatyn dári-dármek tıeldi. Bul dári-dármektiń tizimi Aýǵanstan tarapy suratqan tizbe boıynsha jasaqtalǵan. Atap aıtqanda, azıtromıtsın, ıbýprofen, tseftazıdım, paratsetamol sııaqty ystyq túsiretin, qabynýǵa qarsy preparattar men antıbıotıkter jetkizildi.

Foto: Kazinform

Zilzala saldarymen kúres shtabynyń ókili Garval Abdýl Sattar Gerat provıntsııasyndaǵy zilzala kezinde qırandyǵa aınalǵan 13 eldi mekenniń turǵyndaryna áli de shatyrlar men medıtsınalyq buıymdar, dári-dármek óte qajet ekenin aıtady.

Foto: Kazinform

Eske salsaq, 7 qazan kúni Aýǵanstannyń batysyndaǵy Gerat provıntsııasyndaǵy 6,3 baldyq jer silkinisinen 2053 adam qaza taýyp, 9 myńnan astam adam jaraqat alǵan. 

Buǵan deıin Qazaqstannyń Aýǵanstanǵa gýmanıtarlyq kómek kórsetetini habarlanǵan edi. 

Ulttyq ulannyń arnaıy bortyna 16 tonna gýmanıtarlyq júk tıelip Aýǵanstanǵa ushýǵa daıyn turǵanyn habarlaǵanbyz. Júktiń bir bóligi áýe kóligi arqyly jetkizilse, bir bóligi temirjol kóligimen jóneltiledi.

Sonymen qatar Aýǵanstanǵa úıindi astynda qalǵan adamdardy qutqarý úshin TJM qutqarýshylary, sonyń ishinde kınolog mamandar jiberiledi.

Syrtqy ister mınıstrliginiń resmı ókili Aıbek Smadııarovtyń aıtýynsha, Aýǵanstandaǵy jer silkinisinen Qazaqstan azamattary zardap shekken joq.