Qazaqstannan shetelge apta saıyn 567 reıs qatynaıdy

<p>ASTANA. KAZINFORM &ndash; Búginde elimizden halyqaralyq baǵytta 28 elge 121 marshrýt boıynsha aptasyna 567 reıs jıiligimen ushaqtar ushyp, jolaýshylardy tasymaldaıdy. Bul týraly QR Kólik mınıstrliginiń baspasóz qyzmeti málimdedi.</p>

Reısterdiń basym bóligi Reseı Federatsııasyna ushady. Atap aıtqanda, aptasyna 31 áýe baǵyty boıynsha Máskeý, Sankt-Peterbýrg, Ekaterınbýrg, Mıneralnye vody, Qazan, Sochı, Krasnoıarsk, Novosıbırsk, Mahachkala jáne Groznyı qalalaryna 139 reıs oryndalady.

Al Túrkııaǵa 18 áýe baǵyty boıynsha Stambýl, Ankara, Antalııa qalalaryna aptasyna 125 reıs jıiligimen jáne Birikken Arab Ámirlikteriniń Dýbaı, Abý-Dabı, Shardja qalalaryna 58 reıs 6 áýe baǵyty boıynsha uıymdastyrylǵan.

Qazaqstannan Qytaı Halyq Respýblıkasyna qatynaıtyn ushaqtar Beıjiń, Úrimshi, Sıan, Hanchjoý, Sanıa syndy qalalardy qamtyp, 9 áýe baǵyty boıynsha aptasyna 43 reıs júzege asyrylady.

Bıyl jazda jolaýshylardy Vetnam, Taıland, Egıpet jáne Grýzııa memleketterine tasymaldaıtyn áýe reısteriniń sany aıtarlyqtaı arta túspek.