Qazaqstannan Saýd Arabııasyna reıster ashylady

NUR-SULTAN. QazAqparat - Qazan aıynyń úshinshi onkúndiginen bastap «SCAT» áýe kompanııasy Almaty – Djıdda jáne Almaty – Medına baǵyttary boıynsha aptasyna bir reıspen ushýdy bastaıdy.

Bul týraly QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap habarlaıdy.

Qazaqstan Respýblıkasynyń aýmaǵynda koronavırýs ınfektsııanyń paıda bolýy men taralýyna jol bermeý jónindegi vedomstvoaralyq komıssııa (budan ári - Vedomstvoaralyq komıssııa) 2021 jylǵy 7 qyrkúıektegi otyrysynda Qazaqstan men Saýd Arabııasy arasyndaǵy turaqty áýe qatynasyn qalpyna keltirý jóninde sheshim qabyldady.

Saýd Arabııasyna reısterdiń odan ári ulǵaıýy epıdemıologııalyq jaǵdaıǵa, Vedomstvoaralyq komıssııanyń jáne Saýd Arabııasynyń tıisti memlekettik organdarynyń sheshimderine baılanysty bolady.

«Reıster bekitilgen sanıtarlyq-epıdemıologııalyq normalar men áýe kompanııasynyń saıtynda jarııalanǵan kestege sáıkes oryndalady»,-delingen habarlamada.