Qazaqstannan Reseıge qalaı aqsha aýdarýǵa bolady

NUR-SULTAN. QazAqparat – Bıyl reseılik birqatar bank sanktsııaǵa tap bolyp, SWIFT halyqaralyq aýdarym júıesinen ajyratylǵan bolatyn. Sonymen qatar Reseı aýmaǵynda Visa men Mastercard halyqaralyq tólem júıesi de istemeıdi. Qazaqstanda jumys isteıtin reseılik enshiles bankter de atalǵan júıeden ajyratylaǵan. Dál osy jaıt kórshi elmen tyǵys baılanysy bar qazaqstandyqtardyń da tirshiligine áserin tıgizip otyr, dep habarlaıdy QazAqparat tilshisi.

Qazaqstannyń Reseıdegi Elshiligi usynǵan derekke sáıkes, kórshi eldiń joǵary oqý oryndarynda jne ondaǵy sheteldik JOO-lardyń fılıaldarynda 60 myńnan astam qazaqstandyq stýdent bakalavrıatýra, magıstratýra baǵdarlamalary boıynsha bilim alyp jatyr.

Elimizdegi iri saýda jelileriniń birindegi taýar túriniń shamamen 10 paıyzy Reseıden jetkiziledi. Ózge elderden keletin ımport túriniń shamamen 40 paıyzyn da kórshi el arqyly alyp otyrmyz.

Qazirgi ýaqytta Visa men Mastercard tólem júıesi Reseı ishinde ǵana jumys isteıdi. Atalǵan tólem júıesiniń qazaqstandyq bank kartalary Reseıde jaramsyz.

Qazaqstan Elshiligi aqsha aýdarý úshin reseılik «Mır» ulttyq tólem júıesin qoldanýǵa keńes beredi. Qazirgi ýaqytta «Mır» kartasymen Qazaqstannyń tórt banki, atap aıtqanda Halyk Bank, TsentrKredıt banki, Sberbank Qazaqstan, VTB Qazaqstan ǵana jumys isteıdi.

Qazaqstannan Reseıge aqsha aýdarymyn jasaý úshin MIR/Unionpay tólem júıesi bar banktiń debet kartasyn rásimdeý qajet. Sodan soń bank rekvızettern Qazaqstandaǵy ata-anasyna/týystaryna berý kerek. Olar rekvızıt arqyly aqsha qarajatyn aýdara alady. MIR/Unionpay tólem júıesi bar debet kartasyn sanktsııalyq tizimge enbegen bankterdiń bólimshelerinen rásimdeýge bolady.

Qazaqstan Ulttyq banki málimetinshe, qazirgi ýaqytta klıentterge Reseıge bankterdiń (onyń ishinde reseılik enshiles bankter arqyly da) ishki jelilerimen banktik aýdarym jasaý, banktik esepshot ashpaı-aq halyqaralyq aqsha aýdarý júıesiniń qyzmetteri, Visa men Mastercard-tan basqa ózge tólem júıeleriniń tólem kartalary arqyly aqsha jiberý qyzmeti usynylady.

«Qazaqstan men Reseıdiń sharýashylyq sýbektileri arasyndaǵy úzdiksiz esep aıyrysýdy qamtamasyz etý maqsatynda sanktsııalyq shekteýlerge enbegen sýbektilermen iskerlik qatynas ortaý múmkindigin qarastyrǵan jón dep sanaımyz», - dep atap ótedi Ulttyq bank.