Qazaqstannan Ózbekstanǵa jetkiziletin munaı kólemi artady

ASTANA. QazAqparat - Parlament Májilisiniń jalpy otyrysynda «Qazaqstan Úkimeti men Ózbekstan Úkimeti arasyndaǵy Energetıka salasyndaǵy yntymaqtastyqtyń keıbir máseleleri týraly negizdemelik kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Eki el sońǵy jyldary munaı men gaz salasynda aıtarlyqtaı áleýetti damytty. Búginde munaı-gaz jetkizý sektoryndaǵy ózara is-qımyl jolǵa qoıyldy. Memleket basshysynyń 2017 jylǵy 16 qyrkúıekte Ózbekstanǵa jasaǵan resmı sapary barysynda eki el úkimetteri arasynda energetıka salasy boıynsha negizdemelik kelisimge qol qoıyldy. Osy kelisim negizinde eki el arasyndaǵy munaı-gaz, munaı-gaz-hımııasy jáne elektr energetıkasy salasyndaǵy yntymaqtastyq damytylady», - dedi Energetıka mınıstri Qanat Bozymbaev.

Onyń sózine qaraǵanda, kórshi memleketterdiń yntymaǵy artýy úshin geografııalyq jaǵdaılar eskerildi.

«Atalǵan kelisimdi ratıfıkatsııalaý biraz máseleni sheshýge múmkindik beredi. Atap aıtsaq, munaı eksportyn ulǵaıtý úshin Ózbekstanǵa shıki munaı jetkizý, kúzgi-qysqy kezeńde Qazaqstannyń ońtústigin tabıǵı gazben úzdiksiz qamtý máselesi sheshiledi» - dedi mınıstr.

Q. Bozymbaevtyń atap ótýinshe, búginde Ózbekstannyń munaıǵa degen qajettiligin qamtamasyz etý úshin 2018 jyly 260 myń tonnadan astam munaı jetkizildi.