Qazaqstannan Olımpıadaǵa qatysatyn boksshylar Azııa chempıonatynda baq synaıdy

NUR-SULTAN. QazAqparat – 21 mamyr men 1 maýsym aralyǵynda Birikken Arab Ámirlikteriniń Dýbaı qalasynda bokstan erler arasynda Azııa chempıonaty ótedi, dep habarlaıdy QazAqparat tilshisi.

Qazaqstan boks federatsııasy málim etkenindeı, qurlyqtyq dodada el namysyn qorǵaıtyn sportshylar belgili boldy.

49 kg: Danııal Sábıt

52 kg: Sáken Bıbosynov

56 kg: Sabyrhan Mahmud

60 kg: Serik Temirjanov

64 kg: Zákir Safıýllın

69 kg: Abylaıhan Júsipov

75 kg: Ábilhan Amanqul

81 kg: Bekzat Nurdáýletov

91 kg: Vasılıı Levıt

+91 kg: Qamshybek Qońqabaev.

Qazaqstan quramasynyń bas bapkeri Ǵalymbek Kenjebaev Olympic.kz. saıtyna bergen suhbatynda bylaı dedi:

«Bul dodaǵa Olımpıadaǵa qatysatyn boksshylardy túgel alyp baramyz. Óıtkeni, Azııa chempıonaty Tokıo qarsańyndaǵy eń mańyzdy daıyndyq kezeńderiniń biri sanalady. Olımpıadada baq synaıtyn jigitterdi taǵy da bir synap almaqpyz. Sondaı-aq Azııa chempıonaty on salmaq dárejesinde ótetindikten, 57 kelidegi Serik Temirjanovty 60 kelige aýystyrdyq. 52 kelidegi Sabyrhan Mahmud 56 kelide judyryqtasady. 49 kelide elimizdiń eń jas chempıondarynyń biri bolǵan Danııal Sábıtti synǵa qostyq. Olımpıadashylarǵa tolyq múmkindik berdik».

Aıta keteıik, batysqazaqstandyq Danııal Sábıt ótken jyly eresekter arasyndaǵy Qazaqstan chempıonatynda 18 jasynda top jarǵan bolatyn.

Sondaı-aq ol bıyl Sankt-Peterbýrgte ótken halyqaralyq jarysta qola júldeger atandy.

Eske salsaq, budan buryn bokstan 2021 jylǵy álem chempıonaty ótetin ýaqyt belgili boldy.