Qazaqstannan metall qaldyqtaryn shyǵarýǵa ýaqytsha tyıym salyndy

NUR-SULTAN. QazAqparat - El aýmaǵynan qara jáne tústi metaldardyń synyqtary men qaldyqtaryn shyǵarýǵa ýaqytsha tyıym salyndy. Shekteýdi engizýge elimizdiń qaıta óńdeýshileri úshin shıkizattyń tapshylyǵy men óndiristiń tıisti deńgeıde júktelmeýi áser etti, dep habarlaıdy QazAqparat tilshisi.

Bul týraly QR IIDM Indýstrııalyq damý komıteti tóraǵasynyń orynbasary Turar Jolmaǵambetov aıtty.

«Qazirgi ýaqytsha shekteý – bul taktıkalyq qadam. Onyń jalpy strategııasy birazdan beri kele jatqan ındýstrııalandyrý saıasatyna baılanysty. Atap aıtqanda, Memleket basshysy ındýstrııalandyrý saıasaty aıasynda barynsha daıyn ónim shyǵarýǵa erekshe mán berip otyr», - dedi T. Jolmaǵambetov Ortalyq kommýnıkatsııalar qyzmetinde.

Onyń aıtýynsha, metall synyqtaryn shekaradan temirjol kóligimen tasymaldaýǵa bolady. Al túrli tústi metall synyqtary men qaldyqtar úshin tolyq shekteý engizilgen. Qazirgi kezde qazaqstandyq qaıta óńdeýshilerge tipti ishki metall aınalymy jetispeıdi jáne olar kórshi memleketterden ımporttaýǵa májbúr.

«Negizgi sebep otandyq kásiporyndardyń tıisti deńgeıde qamtamasyz etilmeýine baılanysty. Osy oraıda qara metall synyqtaryn paıdalanatyn metallýrgııa sektory máselesin atap ótýge bolady. Olardyń júktemesi tek úshten bir deńgeıde ǵana. Bizdiń maqsat – olardy tıisti deńgeıde qamtamasyz etý, ıaǵnı kem degende óndiristi 70-80 paıyzǵa kóleminde júkteý», - dedi vedomstvo ókili.

Turar Jolmaǵambetovtyń sózine qaraǵanda, Qazaqstanda metall synyqtary men qaldyqtaryn negizgi shıkizat retinde paıdalanatyn 20-dan astam kásiporyn jumys isteıdi. Bul kompanııalar óndirisiniń jıyntyq kólemi 2 trln teńgeden, al eksport 2,5 mlrd AQSh dollarynan asady. Atalǵan kásiporyndarda 37 myńnan astam adam eńbek etedi jáne jylyna 119 mlrd teńgeden astam salyq tóleıdi.

Budan buryn habarlanǵandaı, qara jáne tústi metall synyqtary men qaldyqtary túrindegi shıkizatty syrtqa shyǵarýǵa ýaqytsha tyıym engizildi.