Qazaqstannan Mekkege tikeleı reıs ashylady - QMDB

ASTANA. QazAqparat - Búgin naıb múftı Serikbaı qajy Orazdyń tóraǵalyǵymen ótken jınalysta otandastyrymyz úshin qasıetti Mekkege tikeleı reıs ashý týraly másele kóterildi, dep habarlaıdy QMDB baspasóz qyzmetinen.

Basqosýǵa qatysqan áýe kompanııalary ókilderi bul usynysty oryndaýǵa múmkindik mol ekenin málim etti. Búginde elimizdiń Astana, Almaty, Shymkent qalalarynan Mekkege taıaý ornalasqan Jıdda shaharyna deıin tikeleı reıs ashý múmkindigi qarastyrylýda.

Aıta keteıik, buǵan deıin qajylyq paryzyn óteýshi jerlesterimiz Jıdda qalasyna Túrkııa, Ábý Dabı arqyly jetetin. Sonymen qatar áýejaıda birneshe saǵat boıy kelesi reısti kútetin.

«Bul bastama qajylarymyzǵa qyzmet kórsetý sapasyn arttyrý jumystaryna yqpal etedi. Birinshiden, ýaqyt únemdeledi, ekinshiden, qajylar úshin bul bastama qolaıly jaǵdaı týǵyzady», - dedi QMDB qajylyq mıssııasynyń tóraǵasy, naıb múftı Serikbaı qajy Oraz.

Aıta keteıik, bıyl Qazaqstanǵa Saýd Arabııa Koroldiginiń Qajylyq mınıstrligi 5000 oryn (kvota) bóldi.