Qazaqstannan ketken bilikti mamandardyń bazasy jasala bastady

ASTANA. QazAqparat – Qazaqstannan shetelge qonys aýdarǵan bilikti mamandardyń bazasyn jasaqtaý bastaldy. Bul týraly «Otandastar qory» kommertsııalyq emes aktsıonerlik qoǵamynyń prezıdenti Abzal Saparbekuly málim etti, dep habarlaıdy QazAqparat tilshisi.

«Sońǵy jyldary elden jas, bilikti mamandardyń ketý úrdisi toqtar emes. Mysaly, tek qana AQSh-tyń ózinde 100-den astam óte bilikti ІT-maman júr. Ókinishke qaraı, syrttaǵy bul áleýetti qoldana almaı otyrmyz. Syrttaǵy túrli saladaǵy mamandar men tulǵalardyń ortaq bazasyn jasaýdyń jáne olarmen jumys isteýdiń naqty algorıtmi men jobalaryn usyný mindeti tur. Osy rette qoǵam bul baǵytta tolyq baza qurýdy bastady», - dedi ol qordyń janyndaǵy qoǵamdyq komıssııanyń otyrysynda.

Aıtýynsha, keıingi jyldary AQSh pen Túrkııada ǵana 130 myń qazaqstandyq maman eńbek etip júr.

«Syrttaǵy qazaqtardyń qataryna keıingi jyldary shetelge ketken jańa qazaqtardy qosýǵa bolady. Mysaly, AQSh-ta 100 myńǵa jýyq, Túrkııada 30 myńǵa jýyq, al Eýropada10 myńǵa jýyq jańa qazaqstandyq turyp jatyr», - dedi qordyń prezıdenti.