Qazaqstannan Germanııaǵa munaı jetkizý úshin qandaı baǵyttar qaralyp jatyr
21 jeltoqsanda QazMunaıGaz 2023 jyldyń qańtarynda Germanııaǵa munaı jóneltý múmkindigin qarastyryp jatqany jarııalanǵan edi.
«Qazaqstannan Germanııaǵa munaı jetkizý úshin Atyraý-Samara baǵyty jáne odan ári «Drýjba» munaı qubyry qarastyrylýda. Naqty kólemderi áli anyqtalǵan joq jáne ol qazaqstandyq júk jóneltýshiler úshin munaı jetkizýdiń qoldanystaǵy baǵyttarymen salystyrǵanda osy baǵyttyń tıimdiligine baılanysty bolady», - dep jaýap berdi ulttyq kompanııa agenttik saýalyna.
Kompanııanyń habarlaýynsha, Transneft júıesimen munaıdy eksportqa tasymaldaý qazaqstandyq taraptyń ótinimimen júrgizilýde. Qazirgi ýaqytta Reseı tarapy Germanııa baǵytynda «Drýjba» munaı qubyry arqyly qazaqstandyq munaı jetkizýge kelisý máselesin pysyqtap jatyr. Tıisti ótinimdi qazaqstandyq tarap jibergen.
2021 jyly Atyraý-Samara arqyly 12,2 mln tonna munaı, onyń ishinde 1 mln tonna Pavlodar munaı-hımııa zaýytynyń ónimi Tuımazy-Omby-Novosibir-2 munaı qubyry arqyly tasymaldanǵan.
Al 2022 jyldyń qorytyndysy boıynsha tasymaldaý kólemi 10,4 mln tonnaǵa deıin tómendeıdi dep kútilýde, biraq burynǵy tasymaldaý kólemi Pavlodardaǵy zaýytta 1 mln tonnaǵa deıin saqtalady.
Foto: longislandbusiness.com