Qazaqstannan etti eksportqa shyǵarýǵa múmkindik mol - Nurjan Áltaev
Bul týraly Jáńgir han atyndaǵy Batys Qazaqstan agrarlyq-tehnıkalyq ýnıversıtetinde «Oblystyń agroónerkásip kesheni ónimderiniń eksporttyq bolashaǵy» degen taqyrypta ótken dóńgelek ústel otyrysynda «Atameken» Ulttyq kásipkerler palatasy basqarma tóraǵasynyń orynbasary Nurjan Áltaev málim etti, dep habarlaıdy «QazAqparat» tilshisi.
Jıyndy ashqan oblys ákimi Altaı Kólginovtiń atap ótkenindeı, Elbasynyń bıylǵy Joldaýynda aýyl sharýashylyǵy salasy ekonomıkanyń draıveri bolýy kerektigi aıtylyp, osyǵan oraı úlken mindetter qoıylǵany belgili. Bul rette Batys Qazaqstan oblysyndaǵy aýyl sharýashylyǵy taýaryn óndirýshilerge de keń jol ashylyp otyr. Elbasy tapsyrmasyna sáıkes memlekettiń qoldaýymen et eksportyn arttyrýǵa barynsha jaǵdaı jasalýda. Sonyń nátıjesinde 2011-2016 jyldary óńirde 5 myńnan astam tonna etti syrtqa jóneltý kózdelse, ol 7800 tonna bolyp oryndaldy. Sondyqtan bul etti eksporttaýǵa daıyn taýar óndirýshilerdi durys baǵyttaı bilse, múmkindiktiń moldyǵyn kórsetedi.
Nurjan Áltaevtyń sózine qaraǵanda, sońǵy kezde qol jetkizilgen kelisimder nátıjesinde Qytaı qazaqstandyq taýarlarǵa óz naryǵyn ashýǵa daıyn. Qazir kedergiler birinen keıin biri alynýda. Kúni búgin azyq-túlik, bal, qoı etin jetkizýge kelisim bar. Taıaý ýaqytta qytaılyq maldárigerlik ınspektorlar óńirlerge, sonyń ishinde Batys Qazaqstan oblysyna kelip, qoı etin óndiretin kásiporyndar jumysymen tanysady. Sondaı-aq jyl aıaǵyna deıin sıyr etin shyǵarý máselesin de sheshý oılastyrylýda. Qytaı naryǵyna kúnbaǵys maıyn da molynan jóneltýge bolady. Jalpy, Qytaı aldaǵy bes jylda 5 trln. dollardyń taýaryn satyp alýdy josparlaýda, sonyń 60 paıyzyn tamaq ónimderi quramaq.
Sol sekildi Izraıl qoı men sıyr etin, taýyq jumyrtqasyn satyp alýǵa ázir. Qazaqstandyq ónimderge Iran, Parsy shyǵanaǵy elderi de qyzyǵýshylyq tanytýda. Ótken jyldan beri Arab elderine qoıdy tirileı jetkizý jumysy bastaldy. Aldaǵy mamyr aıynda Astanada qytaılyq kompanııalardyń qatysymen forým uıymdastyrylatyn bolsa, Izraıl astanasy Tel-Avıvte de sondaı jıyn ótedi. Mine, osy sharalarǵa batysqazaqstandyq kásipkerler de baryp, baılanys ornatsa, ózderine tıimdi bolmaq.
Jıynǵa qatysqan «Atameken» UKP syrtqy saýda palatasynyń basqarma tóraǵasy Aıan Erenovtiń málim etkenindeı, bul rette kásipkerler qazaqstandyq ónimderdi eksporttaý máselesimen aınalysatyn saýda palatasymen birge jumystanýy kerek. Birinshiden, eksporterler bazasy bar, ekinshiden, saýda palatasy shet elderge ónim shyǵarýǵa baılanysty taýardy sertıfıkattaý, qoraptarǵa salý sekildi máselelerge qatysty málimet berip, qolushyn beredi.