Qazaqstannan bıdaı men bıdaı unyn syrtqa áketýge shekteýler engizilýde

NUR-SULTAN. QazAqparat - 2022 jylǵy 30 qyrkúıekke deıin Qazaqstan aýmaǵynan bıdaı men meslındi, bıdaı jáne qara bıdaı unyn áketýge kvotalar engizilýde. Bul týraly Memlekettik kirister komıteti málimdedi, dep habarlaıdy QazAqparat.

«Qazaqstan aýmaǵynan jekelegen taýarlardy áketýdiń keıbir máseleleri týraly» Aýyl sharýashylyǵy mınıstriniń m.a. 2022 jylǵy 5 shildedegi buıryǵymen el aýmaǵynan úshinshi elderge jáne Eýrazııalyq ekonomıkalyq odaq elderine 550 000 tonna kóleminde bıdaı men meslındi (SEQ TN kody – 1001) jáne 370 000 tonna kóleminde bıdaı jáne qara bıdaı unyn (SEQ TN kody - 110100) áketýge sandyq shekteýler (kvotalar) engiziledi. Shekteýler 2022 jylǵy 8 shildeden bastap 30 qyrkúıekke deıin kúshinde bolmaq», - dep jazdy vedomstvo.

Bıdaı men meslındi, bıdaı jáne qara bıdaı unyn áketýge sandyq shekteýler el ishinde azyq-túlik qaýipsizdigin qamtamasyz etý maqsatynda qolǵa alyndy.

Bul rette buıryq qoldanysqa engizilgen kúnge deıin QR jáne EAEO kedendik zańnamasyna sáıkes eksporttyń kedendik rásimi boıynsha ornalastyrylǵan jáne shyǵarylǵan taýarlar Qazaqstan Respýblıkasynyń aýmaǵynan kedergisiz áketýge jatady.