Qazaqstannan asyrap alynǵan múgedek bala 5 shaqyrymǵa júgirip júr

ASTANA. QazAqparat - 13 jyl buryn tórt jasynda asyrap alynǵan Tımýr Fergıon aýrýǵa berilmeı, 5 shaqyrym qashyqtyqty eńserýde. Ol Kolorado shtatynda Granbı qalasynda júgirý sportymen aınalysady. Ol amerıkalyq ákesi Djım Fergıonǵa alǵysy sheksiz, dep jazdy Hartford Courant.

Tımýr jambas býynynyń qos dısplazııasymen ómirge keldi,  oǵan úsh jasqa deıin birneshe ota jasaldy, 5 jasqa deıin júre almady. Balalar úıinde 4 jasyna deıin boldy.

Djım Fergıon balalardy asyrap alǵan kezde jasy 52-de boldy. Áıelimen ajyrasqan, eki balasyn óz tárbıelep otyrǵan edi. Onyń zeınetkerlikke shyǵýyna 4 jyl qalǵan bolatyn. Ol Bredlı halyqaralyq áýejaıynda dıspetcher bolyp jumys istedi.

 

Ol Qazaqstannan bala asyrap alý jaıyn qarastyryp júrip, munda birneshe balany qamqorlyqqa alýǵa múmkindik beriletinin bildi. Tımýr ógeı ákesimen alǵash ret 2002 jyly kezdesti. Qujat retteý 11 aıǵa sozyldy. 2003 jyly  Djım Fergıon 4 jasar Tımýr men 2 jasar Ámınany asyrap alady. Basynda qıyn boldy. Sebebi balalar aǵylshyn tilin bilmedi. Tımýr qaıtadan balabaqshaǵa bardy.

Tımýrǵa aýyr ota jasaldy. Ótken qysta Konnektıkýtta Balalar medıtsınalyq ortalyǵynda tolyq saýyqtyrýdan ótti. Aqsańdap júrgenine qaramastan 17 jastaǵy Tıma oıly-qyrly jerlermen júgirgendi unatady. Naıza laqtyrý, syryqpen sekirý, qysta snoýbordpen aınalysady.

 

«Ol keremet jigit, - dedi Tımýrdyń bapkeri Dennıs Lobo. - basqalaryna úlgi bolýda. Ol úzdik komandalyq oıynshy».

Qazir Djım Fergıon Konnektıkýttaǵy balalar medıtsınalyq ortalyǵynyń burynǵy medbıkesi  Djo-Enn Smıtke úılengen. Qyzy Ámına - Granby High ekinshi kýrs stýdenti. Fýtbol komandasynda oınaıdy, jeńil atletıkamen aınalysady.

Tımanyń balalar úıindegi kishkene kezderi esinde joq. Onyń aıtýynsha, júgirýde oǵan márege kelý qatty unaıdy eken. «Maǵan alǵa qoıǵan maqsatqa jetkennen keıingi kúıim erekshe áser etedi», - dedi ol kúlip.