Qazaqstannan Armenııaǵa jiberilgen munaı basqa elderge satylsa, ótemaqy tólenedi
Aıta keteıik, Parlament Senatynda Armenııa Respýblıkasyna munaı ónimderin berý jónindegi saýda-ekonomıkalyq yntymaqtastyq kelisimi ratıfıkatsııalandy.
«Bul kelisimde ishki naryqty qorǵaý maqsatynda ýákiletti organnyń Armenııaǵa taýar áketýge ýaqytsha shekteý belgileýge quqyǵy bar ekeni reglamenttelgen. Taýar tasymaldaý avtomobıl, temir jol jáne teńiz kóligimen júzege asyrylady. Kelisimniń taǵy bir ereksheligi – Armenııanyń satyp alynǵan munaı ónimderin úshinshi elderge satý faktileri anyqtalǵan jaǵdaıda Qazaqstanǵa ótemaqy tóleýge tıis», - dedi Senat depýtaty Baýyrjan Qanıev.
Senatordyń aıtýynsha, kelisim Qazaqstannyń Armenııaǵa AI-92, 95, 98 markaly benzınin jáne dızel otyny sııaqty taýarlardy jetkizý boıynsha júzege asyrý qajet sharttardy aıqyndaıdy.
Saýda-ekonomıkalyq jáne ózara tıimdi yntymaqtastyq eki taraptyń ózara múddelerin qorǵaýǵa negizdeledi.
Kelisimde atalǵan taýarlardy óndirý kólemi, ishki tutyný teńgerimi, ımport pen eksport negizinde Armenııaǵa tasymaldaý jónindegi quzyretti ýákiletti organdar men uıymdar aıqyndalǵan.
QR Energetıka vıtse-mınıstri Áset Maǵaýovtyń aıtýynsha, bul kelisim baqylaýdyń birqatar tetikterin qarastyrady.
«Qazaqstan ulttyq qaýipsizdikti qamtamasyz etý jáne ishki naryqty qorǵaý maqsatynda ındıkatıvti balansta bekitilgen kólem asyp ketken jaǵdaıda, fors-major jaǵdaılarynda, sondaı-aq Armenııa óz aýmaǵynan qazaqstandyq munaı ónimderin úshinshi elderge jáne Eýrazııa ekonomıkalyq odaq elderine áketý tyıymy boıynsha mindettemesin buzǵan bolsa, Qazaqstan birjaqty tártippen Armenııaǵa munaı ónimderin bajsyz jetkizýdi toqtata jáne shekteı alady. Sondyqtan bizdiń ishki naryǵymyz úshin qaýip-qater joq», - dedi Á. Maǵaýov.
Aıta keteıik, Eýrazııa ekonomıkalyq odaq músheleri arasyndaǵy munaı jáne munaı ónimderin jetkizý 2014 jylǵy 29 mamyrdaǵy EAEO týraly shartqa sáıkes jekelegen ekijaqty kelisimmen retteledi.
2020 jylǵy 16 shildede Nur-Sultan qalasynda Armenııa Respýblıkasyna munaı ónimderin berý salasyndaǵy saýda-ekonomıkalyq yntymaqtastyq týraly kelisimge qol qoıylǵan.