Togo eliniń basshysy: Qazaqstanmen strategııalyq seriktes bolýǵa múmkindik bar

<p>Qazaqstanmen strategııalyq seriktes bolýǵa múmkindik bar. Bul týraly Memleket basshysy Qasym-Jomart Toqaevpen <a href="https://t.me/aqorda_resmi/13636" target="_blank" rel="noopener">Aqordada</a> keńeıtilgen quramda kelissóz ótkizgen Togo Respýblıkasynyń basshysy For Essozımna Gnassıngbe aıtty, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>.</p>

For Gnassıngbe qurmet kórsetkeni úshin Qazaqstan tarapyna alǵys aıtyp, ózara múddeni kózdeıtin ekonomıkanyń túrli salalarynda yntymaqtastyq ornatýǵa beıildi ekenin rastady

«Qazaqstanǵa saparmen kelýge shaqyrýyńyz bizdiń qarym-qatynasymyzǵa tyń serpin beredi. Qazaqstan men Togonyń strategııalyq seriktes bolýǵa múmkindigi bar. Sizdiń elińizdiń ekonomıkalyq áleýeti zor. Bizdiń delegatsııa saýda, ekonomıka, taý-ken, aýyl sharýashylyǵy, kólik, tsıfrlandyrý salalaryndaǵy yntymaqtastyqty keńeıtýge múddeli. Jan-jaqty baılanys ornatýǵa baǵyttalǵan kelissózderimiz qos taraptyń ózara yqpaldastyqty tereńdetýge nıetti ekenin aıqyn kórsetti», – dedi Togo Prezıdenti.

Memleketter basshylary Qazaqstan men Togo arasyndaǵy seriktestikti damytý perspektıvalaryn talqylady. Sondaı-aq kelissóz barysynda saıası dıalogty jolǵa qoıýǵa, saýda-ekonomıkalyq, ınvestıtsııalyq, energetıkalyq, kólik-logıstıkalyq jáne mádenı-gýmanıtarlyq salalardaǵy yntymaqtastyqty keńeıtýge, densaýlyq saqtaý jáne áskerı ónerkásip baǵytynda ózara yqpaldastyq ornatýǵa erekshe nazar aýdaryldy.

Qasym-Jomart Toqaevtyń shaqyrýymen 27-28 qarashada Togo Respýblıkasynyń Prezıdenti For Essozımna Gnassıngbe Qazaqstanǵa resmı saparmen keletinin buǵan deıin jazǵan bolatynbyz. Búgin QR Prezıdenti Aqordada For Essozımna Gnassıngbeni saltanatty túrde qarsy aldy. Keıin qos el basshylary shaǵyn quramda kelissóz ótkizdi. Al keńeıtilgen quramdaǵy áńgime barysynda Q.Toqaev Qazaqstan Togomen aradaǵy yqpaldastyqty nyǵaıtýǵa múddeli ekenin, Togony Afrıkadaǵy mańyzdy seriktes retinde qarastyratynyn atap ótti.

Qazaqstan Prezıdentiniń keńesshisi – Baspasóz hatshysy Berik Ýálıuly bul sapardyń máni men mańyzy týraly aıtty.

Kazinform tilshisi Togo Respýblıkasynyń tarıhyna, prezıdentine qatysty ǵalamtordaǵy derekterge kóz júgirtken edi.