Qazaqstanmen ózara tıimdi yntymaqtastyqty arttyrýdy jalǵastyrý kerek – Sı Tszınpın

NUR-SULTAN. QazAqparat – Kelesi jyly Qazaqstan men Qytaı arasyndaǵy «Jibek joly ekonomıkalyq beldeýin» birlese salý bastamasyna on jyl tolady. Bul týraly Qytaı Halyq Respýblıkasynyń Tóraǵasy Sı Tszınpın «Kazahstanskaıa pravda» gazetinde jarııalanǵan maqalasynda jazdy, dep habarlaıdy QazAqparat.

«Ózara tıimdi yntymaqtastyqty arttyrýdy jalǵastyrý óte mańyzdy. Kelesi jyly men Qazaqstanda usynǵan «Jibek joly ekonomıkalyq beldeýin» birlesip salý bastamasyna týra 10 jyl tolady. Osy ýaqyt aralyǵynda «Bir beldeý – bir jol» bastamasy teorııalyq damýdan praktıkalyq iske asyrýǵa kóshti», - dep jazdy Sı Tszınpın.

QHR Tóraǵasy atap ótkendeı, «Bir beldeý – bir jol» bastamasy ózin halyqaralyq yntymaqtastyqtyń ınklıýzıv jáne ashyq alańy retinde, álemdik qaýymdastyqtyń jalpy qoldaýyna ıe bolǵan halyqaralyq qoǵamdyq ıgilik retinde kórsete aldy.

«Kovıdtan keıingi kezeńde bizdiń elderimiz ınvestıtsııalyq jáne saýda rásimderin ońaılatý, baqylaý-ótkizý beketi men tranzıttik tasymaldardyń ótkizý múmkindikterin ashý, jasandy ıntellekt, aýqymdy derekter, tsıfrlyq qarjy, elektrondy kommertsııa, jasyl energetıka sııaqty salalarda jańa ósý núktelerin damytý maqsatynda «Bir beldeý – bir jol» birlesken jobasynda ári qaraı alǵa jyljýy tıis. Biz turaqty damý úshin joǵary standarttardy qoldana otyryp, áleýmettik mańyzy bar jobalardy iske asyryp, pragmatıkalyq yntymaqtastyqty sapaly jańa deńgeıge kóterip, jahandyq damý jónindegi bastamany iske asyrýǵa yqpal etýimiz qajet jáne álemdik ekonomıkany qalpyna keltirýge ortaq úlesimizdi qosýymyz kerek», - dep esepteıdi Sı Tszınpın.

Eske salsaq, Qytaı basshysy 14 qyrkúıek kúni Qazaqstanǵa memlekettik saparmen keledi.

Foto:imgur.com