Qazaqstanǵa jazǵy maýsymda 448 myń sheteldik týrıst keldi

<p>eQonaq aqparattyq júıesiniń deregi boıynsha jazdyń úsh aıynda elimizge 448 myń sheteldik týrıst keldi. Olardyń 64,6%-y er azamattar. Al sheteldik qonaqtardyń basym bóligi 30-44 jas aralyǵyndaǵylar, dep habarlaıdy <a href="https://kaz.inform.kz/" target="_blank" rel="noopener">QazAqparat</a>.</p>

Sheteldikter eń kóp toqtaǵan óńirlerdiń kóshin Almaty qalasy bastap tur. Ońtústik astanamyzǵa 139 myńnan astam týrıst kelgen. Al, ekinshi orynda Astana qalasy. Elordaǵa jazǵy maýsymda 68 myń sheteldik qonaq toqtaǵan. Úzdik úshtikti Almaty oblysy túıindeıdi. Munda 34 myńǵa jýyq sheteldik saıahattap kelgen.

Elimizdiń batysy da sheteldikter jıi baratyn óńir sanalady. Máselen, jazdyń úsh aıynda Mańǵystaý oblysyna 28 myńnan astam shetel azamaty kelse, Atyraý oblysyna 25 myńnan artyq sheteldik týrıst toqtaǵan.

«Sondaı-aq Aqmola oblysyna 21 myńǵa jýyq, Jambyl, Aqtóbe, Qaraǵandy men Soltústik Qazaqstan oblystaryna 14 myńnan astam sheteldik týrıst kelgen. Jalpy alǵanda, jyl basynan Qazaqstanǵa kelgen sheteldik týrıster sany 1,8 ese artyp otyr. 2023 jyldyń sońyna deıin elimizge 1,4 mln sheteldik týrıst keledi dep boljanýda»,- dedi QR Týrızm jáne sport mınıstrliginiń resmı ókili Móldir Ábdýalıeva.