Qazaqstanǵa jasalǵan kıbershabýyl tasasynda kimder turýy múmkin

ASTANA. QazAqparat – Sońǵy ýaqytta elimizge kıbershabýyl jıilep ketkeni belgili. Osy jaıtqa oraı «Kıbershabýyldardy taldaý jáne tergeý ortalyǵy» zańdy tulǵalar birlestiginiń basshysy Oljas Sátıev pikir bildirdi, dep habarlaıdy QazAqparat tilshisi.

«Qazirgi ýaqytta shabýyldardyń tasasynda naqty kim turǵanyn anyqtaý óte qıyn. Onyń artynda ózge elderdiń úkimettik hakerleri de, kishigirim hakerlik toptar da bolýy múmkin», - dedi Oljas Sátıev agenttik tilshisine bergen suhbatynda.

Onyń pikirinshe, qandaı da bir aqparattyq syltaý bolǵan kezde, máselen jas jigitter hakerlik Telegram-chattarda jınalyp, Qazaqstanǵa DDoS-shabýyl jasaı alady. Ony anyqtaý qıyn.

Oljas Sátıevtiń aıtýynsha, kıbershabýyldar tek elimizde ǵana emes, búkil álemde jıilep ketti. Sondaı-aq sarapshy shabýyldardyń negizgi sebebi jeke kıberqaýipsizdik organynyń bolmaýyna baılanysty dep sanaıdy.

«Iá, elimiz BUU reıtınginiń kıberdaıyndyq ındeksinde 118-orynnan 31-orynǵa kóterildi. Biraq bizde jeke qurylym joq. Elimizge Kıberqaýipsizdik agenttigi qajet. Memleket basshysyna nemese kıberqaýipsizdik máselelerimen aınalysatynQaýipsizdik keńesine baǵynatyn jeke organnyń bolýy óte durys álemdik trend sanalady», - deıdi Oljas Sátıev.