Qazaqstanǵa zańsyz ákelingen iPhone 15 telefondary anyqtaldy

<p>Almaty halyqaralyq áýejaıynda iPhone 15 uıaly telefondary kontabandasynyń joly kesildi, dep habarlaıdy <a href="https://kaz.inform.kz/" target="_blank" rel="noopener">QazAqparat.</a></p>

Qarjy mınıstrliginiń Memlekettik kirister komıtetinen málim etkendeı,22 qyrkúıek kúni «Dýbaı-Almaty» reısin kedendik baqylaý kezinde jeke tulǵadan deklaratsııalanbaǵan iPhone 15 telefonynyń 34 danasy tabyldy. Olardyń aldyn ala eseptelgen kedendik quny – 25,3 mln teńge. Al memleketke keltirilgen shyǵyn 3,1 mln teńgeni quraıdy.

Memlekettik kirister komıtetinen eske salyp ótkendeı, uıaly telefondar jeke taýarlar sanatyna jatady jáne jeke tulǵalar ony kedendik shekara arqyly ótkizgen kezde olardyń sany bir adamǵa eki birlikten aspaýy tıis (QR QM 2015 jylǵy 31 naýryzdaǵy № 250 buıryǵy).

«Tárkilengen taýarlar kedendik rásimdeýden ótý jáne ruqsat qujattaryn jasatý úshin ýaqytsha saqtaý qoımasyna jiberildi.

Uıaly telefondardy deklaratsııalaýsyz ákelýge áreket jasaǵan adam QR Ákimshilik quqyqbuzýshylyq týraly kodekstiń 551-babynyń 1-bóligine sáıkes 103 500 teńge (30 AEK) aıyppul túrinde ákimshilik jaýapkershilikke tartylatyn bolady», - delingen baspasóz habarlamasynda.