Qazaqstanǵa venchýrlyq qarjylandyrý ne úshin qajet - sarapshynyń pikiri
«Venchýrlyq ınvestıtsııalar - ereksheligi mol qural. Bul táýekeli joǵary ınvestıtsııalar ekenin atap ótý kerek. Onyń damýyna áli birshama ýaqyt kerek. Alaıda olarsyz jańa ındýstrııa irge kóterip ketpegen. Internet bolmasa, Facebook bolmas edi. Ol bolmasa Kremnıı shatqaly da bolmas edi. Bizdiń memleket retinde bul úrdiske aralasý nemese aralaspaý sekildi tańdaýymyz joq. Bul jerde qanshalyqty jyldam ári tıimdi aralasý kerektigi týraly másele bar. Tek artta qalyp qalmaý úshin ǵana biz bul protseske ilese bilýimiz kerek», - dedi Ádil Nurǵojın Astana ekonomıkalyq forýmynyń úzilisi kezinde.
Sarapshynyń aıtýyna qaraǵanda, qazirdiń ózinde atalmysh komponent boıynsha Qazaqstan kóshten qalyp bara jatyr. Sonymen birge, sarapshy Qazaqstandaǵy venchýrlyq kapıtal úshin naqty bazanyń qandaı bolýy kerektigin de túsindirdi.
«Bastysy Qazaqstannyń bazalyq ekonomıkalyq salasyna negizdelý kerek. Ol - taý-metallýrgııalyq keshen, munaı óndirisi, agrosektor, logıstıka úshin barlyq tehnologııalardyń múmkindikterin paıdalana bilý. Bizde bul rette qordalanyp qalǵan qanshama máseleniń bary ótirik emes. Tek tehnologııalyq sheshimder ǵana tıimdi bolary daýsyz. Al bul jetistikke venchýrlyq ındýstrııasyz qol jetkizý múmkin emes», - deıdi spıker.
Sonyme birge sarapshy, Qazaqstandaǵy venchýrlyq qorlardyń tıimsiz damyp kele jatqanyna qatysty aıtylǵan synǵa jaýap berdi.
«Tehnologııalyq damý boıynsha Ulttyq agenttikke, ol granttarǵa bólinip jatqan granttardyń tıimdiligi nemese tıimsizdigine qatysty birshama synnyń qarsha boraǵany belgili. Bul rette tek qarapaıym shynaıylyqty eskerý kerek - bul múlde bólek úrdis. Bul jerde endigi kezeńde bıznesmender kerek. Qazirgi ýaqytta biz bul salaǵa naryqtyq mehanızm engizdik. Naryqta júrgen kásibı basqarýshy kompanııalar bul salamen kúnde jumys júrgizýde. Olar belgili bir kompanııalardy taýyp, ony jetildirip, kompanııany qaıta satyp, aqshany qaıtaryp alýda», - deıdi spıker.