Qazaqstanǵa Tájikstannan 3500 tonna gýmanıtarlyq kómek jetti
Sonymen birge Tájikstannan 15 júk kóligine tıelgen kómek te elimizge jetkizildi. Túrkistan oblysy ákiminiń baspasóz qyzmeti habarlaǵandaı, Tájikstannan jalpy 3500 tonna gýmanıtarlyq kómek qabyldandy.
Gýmanıtarlyq kómekti Tájikstan Respýblıkasynyń Tótenshe jaǵdaılar jáne azamattyq qorǵanys komıtetiniń tóraǵasy, mılıtsııa general - polkovnıgi Rýstam Nazarzoda bastap keldi. Tájikstan Respýblıkasynyń Úkimeti janyndaǵy Memlekettik materıaldyq resýrstar agenttigi dırektorynyń orynbasary Sohıb Zıedýlloev gýmanıtarlyq kómek týraly qujatty saltanatty túrde tapsyrdy.
– Qazaqstandaǵy qıyn jaǵdaı bizdiń de janymyzǵa batty. Beıjaı qarap otyra almadyq. Bizdiń elimizde kúrdeli másele týyndasa, eń kóp kómek joldaıtyn el – Qazaqstan. Sondyqtan Tájikstan Respýblıkasynyń Prezıdentiniń sheshimimen osy gýmanıtarlyq kerýendi jetkizip otyrmyz. Biz strategııalyq seriktes elder retinde bir-birimizdi qoldap turýymyz kerek, – dedi Rýstam Nazarzoda.
Delegatsııany Qazaqstan Respýblıkasy Tótenshe jaǵdaılar vıtse-mınıstri Serik Tólenbergenov pen Túrkistan oblysy ákiminiń orynbasary Beısenbaı Tájibaev bastaǵan oblys turǵyndary kútip aldy. Saryaǵash aýdanynyń «Saryaǵash» temirjol stantsııasynda is-shara ótkizildi.
Oblys ákiminiń orynbasary Beısenbaı Tájibaev Tájikstan halqyna alǵysyn aıtyp, rızashylyǵyn bildirdi.
– Búgin mańyzdy jıynda bas qosyp turmyz. Elimizdegi sý tasqynyna baılanysty Tájikstan elinen gýmanıtarlyq kómek keldi. Buǵan deıin de Ortalyq Azııadaǵy baýyrlas elderden kómek kelgen bolatyn. Qyrǵyzstan, Ózbekstannan qoldaý kórsetildi. Búgin Tájikstannan qurylys materıaldary men azyq-túlik jetkizilip otyr. Kórshiles elge alǵysymyzdy bildiremiz. Qos memlekettiń dostyǵy máńgi jasaı bersin, – dedi oblys ákiminiń orynbasary.
Atalǵan is-sharaǵa Saryaǵash aýdanyndaǵy tájik etnosynyń ókilderi, Saryaǵash aýdanynyń aqsaqaldary men aq jaýlyqty analar da qatysty. Gýmanıtarlyq kómekti bastap kelgen Tájikstan Respýblıkasynyń ókilderine qurmet kórsetildi. Qurylys materıaldary men azyq-túlik tıelgen gýmanıtarlyq kerýen sý basqan aımaqtarǵa jiberiledi.