Qazaqstanǵa Tájikstannan 50 myń tonna pııaz jetkiziledi

ASTANA. QazAqparat – QR Saýda jáne ıntegratsııalar mınıstri Serik Jumanǵarın erte pisken pııaz ben kartopty ımporttaý jumystary jaıly málimet berdi, dep habarlaıdy QazAqparat tilshisi.

«Іshki naryqty toltyrý úshin bıylǵy mamyr-maýsym aılarynda erte ımporttalatyn kókónisterdi jetkizý máselesi pysyqtalýda. Ázirge «Tájagropromeksport» 50 000 tonnaǵa deıin erte pisetin pııazdi jetkizip berýge daıyn. Pııaz jetkizýdi uıymdastyrýǵa «KTZ Express» AQ – «KZTE Commerce» fılıaly tartyldy. Bul kompanııa pııazdy ortalyqtan satyp alýdy, kedendik tazartýdy, taýar qabyldaýdy jáne ony aýmaqtyq áleýmettik kásipkerlik korporatsııalarǵa bólýdi uıymdastyrady», - dedi Serik Jumanǵarın Úkimettiń búgingi otyrysynda.

Jergilikti atqarýshy organdar men áleýmettik kásipkerlik korporatsııalar Saryaǵash stantsııasynan taýardy ýaqtyly alyp, óńirlerge jetkizýdi jáne baǵa turaqtylyǵyn qamtamasyz etýi kerek.

Sondaı-aq, «UZKAZTRADE» kompanııasymen birlesip, jetkizýdi qosqanda quny 130 tg/kg bolatyn qyryqqabatty Ózbekstannan satyp alý máselesi qaraldy.

«Túrkistan oblysynyń fermerleri de erte pisken qyryqqabatty osyndaı baǵamen satady. Otandyq taýar óndirýshilerdi qoldaý maqsatynda Ózbekstannan qyryqqabat satyp alýdan bas tartyldy. Qyryqqabat óndirýshileri týraly aqparat barlyq aımaqtarǵa jetkizildi. Egistik basyndaǵy ónim baǵasy mamyr aıynda arzandaı beredi dep kútilýde. Naryqty erte kartoppen qamtamasyz etý úshin Pákistan men Ózbekstannan jetkizý pysyqtalýda», - dep tolyqtyrdy S. Jumanǵarın.