Qazaqstanǵa sport salasy boıynsha ǵylymı zertteý ınstıtýty kerek – Elsııar Qanaǵatov

NUR-SULTAN. QazAqparat – Elimizde sport jáne sporttyq jetistikter boıynsha ǵylymı-zertteý ınstıtýty qurylýy múmkin. Bul týraly QR Ulttyq olımpıada komıteti sport dırektsııasynyń dırektory Elsııar Qanaǵatov málim etti, dep habarlaıdy QazAqparat tilshisi.

«Sheteldik tájirıbeli jattyqtyrýshylardy tartý sportta bar jaıt. Aıtar bolsaq, Qytaı 2008 jyly jazǵy olımpıadany ótkizgen kezde kóptegen sheteldik jattyqtyrýshylardy tartty. Árıne, olardyń qasynda otandyq jattyqtyrýshylar boldy. Atalǵan tájirıbeni biz de qoldanyp jatyrmyz. Short-trekten Koreıa jáne Qytaı elinen jattyqtyrýshylar boldy. Jalpy sportta aıtarlyqtaı nátıjege qol jetkizgimiz kelse, tómennen bastaýymyz kerek. ıAǵnı balalar men jasóspirim jáne buqaralyq sportqa jiti kóńil bólgen jón», - dedi Elsııar Qanaǵatov Beıjińnen tikeleı efırde ótken baspasóz máslıhatynda.

Onyń aıtýynsha, buqaralyq sportty damyta túsý kún tártibindegi másele.

«Árıne, sportta ǵylymnyń da óz orny bar. Men atalǵan máseleni buǵan deıin de kóterip kelemin. Bizde ǵylymı zertteý ınstıtýty joq. Ǵylymı turǵydan zertteý ol kásibı jáne buqaralyq sport úshin de kerek. Búginde sport boıynsha ǵylymı zertteý ınstıtýtyn qurý máselesi kún tártibinde tur. Instıtýt qurylyp, qysqy sport túri odan ári damı túsedi degen úmittemin», - deıdi ol.