Qazaqstanǵa sheteldik ınvestıtsııalar aǵyny 9 aıda 17,8%-ǵa ósti

ASTANA. QazAqparat - 2022 jyldyń 9 aıynyń qorytyndysy boıynsha Qazaqstanǵa tikeleı sheteldik ınvestıtsııalardyń jalpy aǵyny 22,1 mlrd AQSh dollaryn qurady, bul ótken jyldyń sáıkes kezeńimen salystyrǵanda 17,8%-ǵa joǵary, dep habarlaıdy QR SІM baspasóz qyzmeti.

Qazaqstan Respýblıkasy Ulttyq Bankiniń derekteri boıynsha, 2022 jyldyń úsh toqsanynyń kórsetkishi búkil 2021 jyly tartylǵan ınvestıtsııalar kólemimen salystyrýǵa bolady ($23,8 mlrd).

Óńdeý ónerkásibine ınvestıtsııalar aǵynynyń (+36,9%) TShI jalpy kóleminiń 22,3% úlesimen $4,9 mlrd deńgeıine deıin ósýi nazar aýdararlyq. Aýyl sharýashylyǵynda ósim 247% ($23,5 mln) qurady, qurylysta: 87,8% (684,3 mln), kóterme jáne bólshek saýdada: 32,6% (3,8 mlrd), kólik pen qoımada: 20,1% (938,7 mln), taý-ken ónerkásibinde: 11,7% ($10,1 mlrd).

Qazaqstanǵa eń kóp ınvestıtsııalar salǵan elder tizimine Nıderland ($5,5 mlrd), AQSh ($5 mlrd), Shveıtsarııa ($2,6 mlrd), Belgııa ($1,3 mlrd), RF ($1,3 mlrd) jáne Ońtústik Koreıa ($1,1 mlrd) kirdi. Sonymen qatar, Ońtústik Koreıadan TShI aǵyny ekijaqty qatynastar tarıhynda rekordtyq kórsetkishke jetti.

TShI aǵyny ósýiniń oń dınamıkasy – elimizge ınvestıtsııalar aǵynyna qysym jasaıtyn syrtqy faktorlarǵa qaramastan, sheteldik ınvestorlardyń elimizge jáne júrgizilip jatqan reformalarǵa seniminiń dáleli.