Qazaqstanǵa reseılikter aǵylyp kelgenniń ózinde jaǵdaı baqylaýda bolady - komıtet

ASTANA. QazAqparat – Qazaqstanǵa Reseı azamattarynyń ekinshi tolqyny kele me? Bul saýalǵa Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindeti atqarýshy Іlııas Ispanov jaýap berdi, dep habarlaıdy QazAqparat tilshisi.

«Ótken jyly Reseıde azamattardy ishinara mobılızatsııanyń birinshi tolqyny boldy. Biz Qazaqstanǵa kelgen reseılikterdiń aǵynyn baıqadyq. Onyń deni - ártúrli sebepgen mobılızatsııaǵa qatysqysy kelmegen azamattar. Iá, bir mezgilde birden kóp adam aǵylyp keldi. Al qazir jaǵdaı shtattyq rejımde. Kún saıyn elimizge 7 reseılik kelip-ketedi»,- dedi Іlııas Ispanov OKQ-de ótken brıfıngide.

Spıkerdiń sózine sensek, reseılikterdiń byltyrǵy leginen keıin protsesti baqylaý mehanızmi retteldi.

«Reseı azamattarynyń shekaradan ótýinen bastap, toqtaǵan jerine deıingi protsess avtomattandyryldy. Olar elimizde júrip-turý úshin ýaqytsha tirkeýden ótedi. Ótken jyly kelgen reseılikter Eýrazııa ekonomıka odaǵy elderi arasynda qabyldanǵan jańa erejege sáıkes Qazaqstanda 90 kúnnen artyq bola almaıdy. Osylaısha atalǵan el azamattaryna Qazaqstanda belgilengen merzim ishinde ǵana bolý tártibin eskertedi. Elimizge Reseı azamattary aǵylýynyń ekinshi legi bastalǵannyń ózinde tranzıtti qamtamasyz etemiz. Shekaralyq jáne basqa da quzyrly organdar ótken jylǵy jaǵdaıdan biraz sabaq aldy. Jaǵdaı baqylaýda bolady», - deıdi komıtet basshysy.

Eske salsaq, byltyr kúzde kóshi-qon komıteti Qazaqstanǵa kúndelikti keletin reseılikter sany 2 ese artqanyn habarlaǵan edi.