Qazaqstanǵa Reseıden anyqtamasyz kelgen 156 azamat shekaradan keıin qaıtaryldy

NUR-SULTAN. QazAqparat - Pandemııa bastalǵaly beri Aqtóbe oblysynyń aýmaǵynda koronavırýs ınfektsııasynyń taralýynyń aldyn alý maqsatynda Reseı Federatsııasymen shekarada ornalasqan «Jaısań» jáne «Álimbet» ótkizý pýnktterinde táýlik boıy sanıtarııalyq-karantındik baqylaý júzege asyrylýda.

Bul týraly QazAqparat QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııasynyń Telegram kanalyna silteme jasap habarlaıdy.

Ondaǵy aqparattarǵa qaraǵanda, epıdemıologtar shekaradan ótetin adamdarǵa táýlik boıy termometrııa men saýalnama júrgizip, PTR testileýiniń teris nátıjesi bar anyqtamalardyń bolýyn tekseredi.

2020 jyldyń 6-qazany men 2021 jylǵy 15-sáýirine aralyǵynda «Jaısań» jáne «Álimbet» SKP memlekettik shekarasy arqyly barlyǵy 113 957 adam ótti, onyń ishinde anyqtamasy joq 6 749 adam karantındik statsıonarǵa jatqyzylǵan.

Atalǵan ýaqyt aralyǵynda Reseı Federatsııasynan tıisti anyqtamasyz kelgen 75 QR azamatynan COVID-19 anyqtalǵan.

Qazaqstan Respýblıkasyna anyqtamasyz kelgen Reseı Federatsııasynyń 156 azamaty shekaradan keıin qaıtaryldy.