Qazaqstanǵa qýaty 18GVt bolatyn elektr stansasyn salý qajet – mınıstrlik

<p>Aldaǵy 10 jylda qýaty 18GVt bolatyn elektr stansasyn salý qajet. Bul týraly Energetıka mınıstrligi Atom energetıkasy jáne ónerkásibi departamenti dırektorynyń orynbasary Gúlmıra Mursalova aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Bıyl Prezıdent óz Joldaýynda atom elektr stansasyn salý máselesi referendýmǵa shyǵarylatyndyǵyn jarııalady. Referendýmda oń sheshim qabyldanǵan jaǵdaıda osy baǵyttaǵy jumys jalǵasady. Jalpy elimizde aldaǵy 10 jylda qýaty 18 gıgavattan astam elektr stansasyn salý qajet. Árıne, qoldanystaǵy kómirmen jumys isteıtin stansalar jańartýdan ótip, jańartylatyn energııa kózderi de damytylyp jatyr. Gazben jumys isteıtin stansalar da salynady», - dedi Gúlmıra Mursalova atom energetıkasyn damytý máselelerine arnalǵan bıznes-forýmda. 

Mınıstrlik ókiliniń atap ótýinshe, elimizde jańartylǵan energııa kózderi jalpy óndiriletin energııanyń 4 paıyzyn quraıdy.

«Alaıda ol aýa raıyna táýeldi bolǵandyqtan – turaqsyz. Qazaqstanda jasyl, turaqty energııa kózin salý kerek bolyp tur. Óıtkeni, qazirdiń ózinde keıde keshki ýaqyttarda energııa tapshylyǵy týyndaıdy. Jazda aıyna 600 mlrd kv/saǵat elektr energııasyn satyp alatyn kezder bolady. Ony kórshiles elderden alamyz. Bolashaqta mundaı jaǵdaı bolmaýy úshin atom elektr stansasyn salý máselesin qarastyryp, talqylap jatyrmyz», - dedi ol.