Qazaqstanǵa krematorıı qurylysy ne úshin qajet boldy – Ádilet mınıstrliginiń jaýaby
«Pandemııanyń sharyqtaý shegi kezinde COVID-19 indetinen kóz jumǵan azamattardyń sany kúrt ósip ketti. Aýrýhanalardyń patologo-anatomııalyq bıýrosy men sot-medıtsınalyq morgtarǵa adamdardyń denesi kóp jetkizilip, ondaǵy qyzmetkerler júktemeni eńsere almaı jatty. Al bul jaǵdaı halyqtyń ashýyn týǵyzdy. Sonymen qatar kisilerdiń denesin patologo-anatomııalyq jáne sot-medıtsınalyq ashý kezinde medıtsınalyq maska, kostıým, paket, bınt, shprıts sekildi qaýipti zattar kóbeıip ketti», - dep túsindirdi Temirbolat Qojamjarov.
Onyń aıtýynsha mundaı jaǵdaıda qaýipti zattardy joıýdyń birden bir amaly – arnaıy peshterde órteý. Ólimniń burynǵydan kóbirek tirkelip, qaýipti zattardyń artýy Nur-Sultan jáne Almaty qalalarynda asa qaýipti bıologııalyq qaldyqtardy joıýǵa arnalǵan joǵary tehnologııaly peshteri bar patologo-anatomııalyq bıýrolardy salýǵa májbúrlegen.
«Qazaqstanda ómirden ótip ketken shetel azamattaryn jerleýge qatysty da problema týyndady. 2019 jyly qaıtys bolǵan 50 sheteldik azamattyń denesi tekserilse (aǵzasyn ashý arqyly zertteý), ótip ketken jyly 200 azamatty osylaı tekserýge týra keldi. Shekaralar jabylyp, otanyna qaıtarý múmkin bolmaǵandyqtan, olardyń týǵan-týystary morgtarǵa júginip, krematsııa jasatýǵa ótinish bildirdi. Patologo-anatomııalyq bıýrolar asa qaýipti vırýstan nemese koronavırýstan kóz jumǵan bizdiń azamattardyń denesin krematsııalaýdy kózdemeıdi. QR Densaýlyq saqtaý mınıstri 2018 jylǵy 18 jeltoqsanda bekitken №40 buıryǵynyń 239-erejesiniń 4-bóliginde kórsetilgendeı, adamnyń denesi tek týǵan-týystarynyń kelisimi boıynsha krematsııalanady. Krematsııadan keıin kúli týystaryna beriledi. Osy maqsatta Ádilet mınıstrligine joǵary tehnologııaly peshteri bar patologo- anatomııalyq bıýrolardy salý úshin Nur-Sultan qalasyna arnalyp 1 mlrd 475 mln teńge, al Almaty qalasyn arnalyp 1 mlrd 744 mln teńge bólindi», - dep qosty Temirbolat Qojamjarov.