Qazaqstanǵa qonys aýdarýǵa bel býǵan qandastar úshin jańa saıt iske qosyldy

NUR-SULTAN. QazAqparat - «Otandastar qory» ázirlegen erulik.kz veb-platformasynyń tusaýkeseri ótti, dep habarlaıdy QazAqparat.

Qordyń bapasóz qyzmetiniń málimetinshe, is-shara barysynda sheteldegi qazaq qaýymdastyǵyna jańa ashylǵan saıt jan-jaqty tanystyrylǵan.

Erulik.kz degenimiz – Otanyna qonys aýdarýǵa bel býǵan qandastarǵa arnalǵan veb-platforma.

«Saıttyń basty maqsaty – Qazaqstanǵa kóship kelýge sheshim qabyldaǵan qandastarǵa basymdyqqa ıe 5 oblystyń (Aqmola, Pavlodar, Qostanaı, Soltústik jáne Shyǵys Qazaqstan oblystary) áleýmettik-ekonomıkalyq damý deńgeıimen tanystyrý jáne qonys aýdarýǵa qolaıly eldi mekenderdi tańdaýǵa múmkindik usyný», delingen habarlamada.

Aqparat jáne qoǵamdyq damý mınıstrliginiń tapsyrmasymen ázirlengen veb-platforma arqyly Qazaqstanǵa qonys aýdarýdy josparlaǵan kez kelgen qandasymyzǵa ornalasqysy keletin eldi mekenge qatysty 21 kórsetkish boıynsha jan-jaqty aqparat beriledi.

Atap aıtqanda, saıtta eldi mekenderdegi bos turǵyn-jaılar, ınfraqurylym, áleýmettik mekemeler, ekonomıkalyq áleýet týraly tolyqqandy aqparat bar, sondaı-aq aımaqqa foto sholý jergilikti atqarýshy organdarmen birlese usynylady.

Sonymen qatar, kóship kelgen sátten bastap kóshi-qon úrdisinde talap etiletin qujattar, beıimdeý, balalardy balabaqshaǵa, mektepke ornalastyrý, medıtsınalyq qyzmetterdi alý, tipti kásipkerlik bastaýdyń ońtaıly tetikteri boıynsha aqparat beriledi.