Qazaqstanǵa kelip Rım Papasymen kezdese alatynymyz kóńil qýantady - reseılik din qyzmetkeri

NUR-SULTAN. QazAqparat – Álemdik jáne dástúrli din kóshbasshylary VII seziniń aıasynda Rım Papasy Frantsısktiń qatysýymen ótetin messa sharasyna kelgen reseılik din qyzmekteri sharany tarıhı mańyzy bar oqıǵa dep atady, dep habarlaıdy QazAqparat tilshisi.

«Bul sharaǵa jalǵyz keldim. Men Reseıdegi grek-katolıkterdiń ordenarıatynyń ókilimin. Rım Papasynyń arnaıy kelip, dindesterimen kezdesýi árqashan mańyzdy tarıhı oqıǵa bolyp esepteledi. Papanyń Reseıge kele almaıtyny ókinishti. Biraq bul Qazaqstanǵa kelip turǵan birinshi Rım Papasy emes ekenin bilemiz. Qaıta Qazaqstanǵa kelip Rım Papasymen kezdese alatynymyz kóńil qýantady», - dedi pirádar Ivan.

Reseılik meıman astanadaǵy aýa raıynyń messaǵa kelýshiler úshin jaıly bolyp turǵanyn atady.

«Qazaqstanǵa jıi kelip turamyn, jalpy. Búgin astanadaǵy kún raıynyń jaımashýaq bolyp turýyn adam tilimen aıtsaq, sáıkestik deýge bolatyn shyǵar. Al qudaı nanymymen aıtsaq, jaratýshynyń qudyreti dep túsindirýge bolady.

Rım Papasy bolǵan túrli kezdesýlerde, túrli elderde boldym. Ol kelgen kezde jergilikti kún raıy túbegeıli ózgeredi. 40 gradýs aptap kezinde Rım Papasynyń dinı qyzmet jasaǵany esimde qalypty. Duǵa bastalǵan kezde aspandy bul torlap, kún raıy salqyndap shyǵa kelgen bolatyn», - dedi dinı qyzmetker.

Aıta ketý kerek, eki kúnge sozylatyn sezge 50 elden 100-den astam delegatsııa, onyń ishinde ıslam, hrıstıan, býddızm, ıýdaızm, ındýızm, daosızm, zoroastrızm, sıntoızm dinderiniń ókilderi, sondaı-aq saıasatkerler men qoǵam qaıratkerleri, halyqaralyq uıym músheleri kelgen.

Dinı forýmǵa arnaıy qonaq Rım Papasy Frantsıskten bólek Ál-Azhardyń Joǵarǵy ımamy Ahmed Mohammed Ahmed at-Taıeb, Ierýsalım Patrıarhy III Teofıl, Ashkenazdyń bas ravvıni Davıd Laý, Izraıldiń Bas sefard ravvıni Itshak Iosıf jáne basqa da dinı jetekshiler, birqatar halyqaralyq uıymnyń ókilderi qatysady.

Keshe keshke Prezıdent Qasym-Jomart Toqaev sezdiń arnaıy qonaǵy Rım Papasy Frantsıskti elorda áýejaıynan kútip aldy.

Keıinnen Qazaqstan Prezıdenti men Rım Papasy azamattyq qoǵam jáne dıplomatııalyq korpýs ókilderimen kezdesti.

Kezdesýde katolık shirkeýiniń basshysy Qazaqstannyń ólim jazasynan bas tartqanyna joǵary baǵa berip , Qazaqstan Konstıtýtsııasynyń nanym-senim bostandyǵynyń kepili ekenin atady.

Din kóshbasshysy Frantsısktiń elimizge memlekettik sapary Rım Papasy Ioann II Pavel Qazaqstanǵa 2001 jyly kelgennen keıin alǵash ret ótip jatyr. Búgin ol elordada messa ótkizedi. Oǵan 3 myńǵa jýyq adam qatyspaq.