Qazaqstanǵa keletin baıqaýshylar mıssııalaryn kimder basqarady
Komıssııa múshesi Záýresh Baımoldınanyń aıtýynsha, «Qazaqstan Respýblıkasyndaǵy saılaý týraly» Konstıtýtsııalyq zańnyń 20-2 babyna sáıkes, shet memleketter men xalyqaralyq uıymdardyń baıqaýshylaryn akkredıtatsııadan ótkizý sharalary QR Syrtqy ister mınıstrliginiń usynysy negizinde jasalady. Osy ýaqytqa deıin mınıstrlik 45 baıqaýshyny akkredıtatsııadan ótkizýdi usyndy. Olardyń ishinde TMD baıqaýshylar mıssııasynan 7 adam, TMD Parlamentaralyq Assambleıasynan 22 adam, EQYU Demokratııalyq ınstıtýttar jáne adam quqyqtary jónindegi bıýrodan 12 adam, sondaı-aq, Islam yntymaqtastyq uıymynyń mıssııasy atynan keletin 4 baıqaýshy bar.
«Akkredıtteýge usynystardyń kelip túsýine qaraı baıqaýshylar jónindegi derekter jańartylyp otyratyn bolady», - dedi Z.Baımoldına OSK-nyń búgingi otyrysynda.
Aıta ketken jón, Ortalyq saılaý komıssııasy baıqaýshylar mıssııalaryn bastap keletin adamdardyń tizimin de jarııalady. Atap aıtqanda, TMD-nyń baıqaýshylar mıssııasyn osy uıymnyń atqarýshy komıtetiniń tóraǵasy Sergeı Lebedev, TMD Parlamentaralyq Assambleıasynyń baıqaýshylaryn Bas xatshy - Assambleıa keńesi xatshylyǵynyń basshysy Dmıtrıı Kobıtskıı, Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary jónindegi bıýrosynyń baıqaýshylar tobyn Polshanyń Eýropa keńesindegi burynǵy elshisi, osy eldiń Nıý-Iorktegi Bas konsýly Ýrshýla Gatsek, Shanxaı yntymaqtastyq uıymynyń baıqaýshylaryn osy uıymnyń Bas xatshysy Vladımır Norov, al Islam yntymaqtastyq uıymynyń baıqaýshylar tobyn uıymnyń saıası máseleler jónindegi departament dırektory Maxmýd Al Raısı bastap keledi.