Qazaqstanǵa ınvestıtsııa quıǵan sheteldikter ımmıgrant vızasyn jáne 10 jyl turýǵa ruqsat alady

ASTANA. QazAqparat – El ekonomıkasyna 300 myń dollardan artyq ınvestıtsııa quıǵan shetel azamattaryna ımmıgrant vızasy berilmek. Bul týraly Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy Іlııas Ispanov aıtyp berdi, dep habarlaıdy QazAqparat tilshisi.

«Memleket basshysy Úkimettiń keńeıtilgen otyrysynda shetelden bıznes ınvestıtsııalardy tartý máselesin kóterdi. Osy oraıda Prezıdent tapsyrmasyna sáıkes, sheteldik bıznes ınvestıtsııasyn kóbirek tartý maqsatynda, protsesti jeńildetý jaǵy qaralyp jatyr. Naqtyraq aıtqanda, Qazaqstan ekonomıkasyna 300 myń dollardan artyq ınvestıtsııa quıǵan shetel azamattaryna jańa ıaǵnı ımmıgrant vızasyn berý», - dedi Іlııas Ispanov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, ımmıgrant vızasyn alǵan sheteldikterge elimizde 10 jylǵa deıin turýǵa yqtııar hat berý jaǵy da qaralyp jatyr.

«Bizde shetel azamattaryna ınvestıtsııalyq vıza berýdiń múmkindigi mol. Sebebi olar elimizde jańa jumys oryndaryn ashady jáne qazynaǵa salyq tóleıdi», - deıdi ol.

Buǵan deıin Eńbek mınıstrliginiń ókili elimizge sheteldik jumys kúshin tartý jaǵdaıymen tanystyrǵan edi.

1 sáýirdegi derekke sáıkes elimizde 14 417 shetel azamaty jumys istep jatyr.