Qazaqstanǵa Eýropadan qulandar ákelinbek

ASTANA. QazAqparat - Qazaqstanda Prjevalskıı jylqylaryn tumsa tabıǵatqa qaıta oraltý ulttyq baǵdarlamasy iske asyryla bastady. Bul týraly Qazaqstannyń Bıoalýandylyqty saqtaý qaýymdastyǵynyń 10 jyldyǵyna arnalǵan baspasóz máslıhatynda uıymnyń atqarýshy dırektory Gúlmıra Izimbergenova málim etti.

"Qazaqstannyń tumsa tabıǵatyna Prjevalskıı jylqylaryn qaıtarý boıynsha baǵdarlamany bastaǵanymyzdy habarlaǵym keledi. 150 jyl buryn olar qazaq dalasynan izim-ǵaıym joǵalyp ketken bolatyn. Frankfýrttyń zoologııalyq qoǵamdastyǵy men qustardy qorǵaýdyń koroldik qoǵamynyń kómegimen biz atalǵan jylqylardy Nıýrnberg zoobaǵynan almaqpyz. Qazaqstanda olarǵa laıyqtalǵan oryndar da salyndy", - dedi ol.

Onyń sózine qaraǵanda, jobany qoldaý úshin jáne metsenattardy osy iske tartý maqsatynda qarasha aıynda tabıǵat aıasynda qaıyrymdylyq baly ótedi. Tilshilerdiń saýalyna jaýap qaıyrý barysynda QBSQ ókili Sergeı Sklerenkoniń aıtýynsha, qulandar 2016 jylǵa deıin Qostanaı oblysynyń Torǵaı jerine ákelinedi. Keıin bul joba barlyq Qazaqstanda iske asyrylmaq. "Jobanyń bastapqy kezeńderdegi quny 100 myńdaǵan AQSh dollaryn quraıdy, jalpy ulttyq deńgeıde oǵan mıllıondaǵan dollar qarjy jumsalmaq", - dep atap ótti ol. Aıta ketý kerek, Qazaqstannyń Bıoalýandylyqty saqtaý qaýymdastyǵy 2004 jyldan beri 100-den astam tabıǵı ártúrlililkti qorǵaýǵa qatysty jobalardy qolǵa aldy. Qazirgi ýaqytta shamamen 20-ǵa jýyq joba iske asyrylýda.