Qazaqstanǵa Aýǵanstannan esirtki tasymaldaıtyn transulttyq qurylymnyń joly kesildi
QR Ulttyq qaýipsizdik komıtetiniń baspasóz qyzmetiniń habarlaýynsha, bul operatsııany qaýipsizdik komıtetiniń ókilderi prokýratýra organdarynyń kelisimi sheńberinde júzege asyrǵan.
Halyqaralyq arnaıy operatsııa nátıjesinde 2021 jylǵy 15 maýsymda Almaty qalasynda 25 kg esirtki quralyn tasymaldaý kezinde esirtki trafıgin uıymdastyrýshy jáne Reseıde osyǵan uqsas esirtki qylmysyn jasaǵany úshin Reseı Federatsııasynyń Federaldy qaýipsizdik qyzmeti izdestirip jatqan «M» atty azamat qylmys ústinde ustaldy.
Atalǵan adam qylmystyq jaýapkershilikten jaltarý maqsatynda Tájikstan Respýblıkasy azamatynyń jalǵan tólqujatyn paıdalanǵan.
Sonymen qatar onyń sybaılasy – Qazaqstan Respýblıkasynyń «K» degen azamaty ustaldy.
«Sotqa deıingi tergeý materıaldary QR Qylmystyq kodeksiniń 286-baby 4-bóligi jáne 297-baby 3-bóligi boıynsha sotqa deıingi tergeýdiń biryńǵaı tizilimine tirkeldi. Esirtki aktsııasyna qatysy bar ózge de adamdardy anyqtaý boıynsha jedel-tergeý is-sharalary jalǵasýda»,-delingen QR UQK baspasóz qyzmetiniń habarlamasynda.