Qazaqstanǵa 7 jyldan asqan kólikterdi ákelýge tyıym salynýy múmkin

<p>ASTANA. KAZINFORM &ndash; Qazaqstan Eýrazııalyq ekonomıkalyq odaq elderine 7 jyldan asqan avtomobılderdi ákelýge tyıym salýdy usynǵaly otyr. Bul týraly QR Ónerkásip jáne qurylys mınıstrligi Integratsııa jáne halyqaralyq yntymaqtastyq departamentiniń dırektory Ádilbek Bektibaev Ýtılsbordyń kúshin joıý jónindegi petıtsııanyń qoǵamdyq talqylaýynda málimdedi.</p>

Onyń aıtýynsha, 2020-2021 jyldary elge EAEO elderinen kólik quraldary ákeline bastaǵan. Olardy zańdastyrý boıynsha bir rettik aktsııa ótkizildi, onyń qorytyndysy boıynsha 2023 jyly 330 myńnan astam avtokólik tirkeldi. Olardyń ortasha merzimi 17 jyldy quraǵan.

«Bul kólik quraldarynyń kópshiligi qaýipsizdik jónindegi tehnıkalyq reglament talaptaryna, ekologııalyq sanatqa saı kelmeıdi. Halyqtyń kem degende 80%-ynda kólik joq ekenin jáne olardyń qalypty ortada ómir súrýge jáne taza aýamen dem alýǵa quqyǵy bar ekenin atap ótkim keledi», - dedi Ádilbek Bektibaev.

Ol Ónerkásip jáne qurylys mınıstrligi kez kelgen jaǵdaıda normatıvti-quqyqtyq aktilerge azamattarǵa jeke paıdalanbaıtyn kólik quraldaryn ákelýge múmkindik bermeıtin ózgerister engizetinin jetkizdi. Sebebi, azamattar kóbinese osy norma boıynsha tsement tasıtyn kólikter men iri júk kólikterin ákelýmen aınalysady.

«Jumys tobynyń múshelerinen elge 7 jyldan asqan kólik ákelýdi shekteý týraly usynys boldy. Biz muny qýanyshpen atqaramyz jáne tıisinshe tehreglamentke osyndaı ózgerister engizý úshin Eýrazııalyq ekonomıkalyq komıssııa keńesiniń otyrysyna materıaldar engizýge tyrysamyz. Eger barlyq bes el bizdi biraýyzdan qoldaıtyn bolsa, onda tutastaı alǵanda Odaq aýmaǵyna mundaı avtomobılder ákelinbeıdi. Bul bólimde biz jumys isteý mindetin moınymyzǵa alamyz», - dedi Ádilbek Bektibaev.