Qazaqstanǵa 24 jylda 952,8 myń oralman keldi

ASTANA. QazAqparat - 1991 jyldan 2015 jylǵy 1 qańtarǵa deıingi kezeńde 259 159 otbasy nemese 952 882 etnıkalyq qazaq (onyń ishinde 2014 jyly 3792 otbasy nemese 8247 adam) tarıhı Otanyna qaıta oralyp, oralman mártebesin aldy. Bul elimiz turǵyndarynyń jalpy sanynyń 5,5% quraıdy.

Qazaqstanǵa kelgen oralmandardyń kópshiligi, ıaǵnı, 61,5% - Ózbekstannan kelgen, sondaı-aq, 14,3% - Qytaıdan, 9,3% - Mońǵolııadan, 6,8% - Túrkimenstannan, 4,6% - Reseıden jáne 3,5% - ózge elderden oralǵan qandastarymyz.

Olardyń 21,2% - Ońtústik Qazaqstan oblysyna, 16,3% - Almaty oblysyna, 13% - Mańǵystaý oblysyna, 9,4% - Jambyl oblysyna, 40,1% - elimizdiń ózge óńirlerine qonystandy.

Elge oralǵan qandastarymyzdyń 55,6% - eńbekke qabiletti jasta bolsa, 18 jasqa deıingileri - 39,9%, zeınetkerler - 4,5% quraıdy.

Eńbekke qabiletti jastaǵy oralmandardyń ishinde 8,7% - joǵary bilimdi, 20,5% - orta arnaýly bilim alǵan, 61% - jalpy orta bilimi bar jáne 9,8%-nyń bilimi bolmaǵan.

Oralman mártebesine ıe bolǵan jandar «Halyq kóshi-qony týraly» QR Zańynda qarastyrylǵan barlyq áleýmettik jeńildikterdi paıdalana alady. Beıimdeý jáne ıntegratsııalyq qyzmetter kórsetý úshin Aqtaý, Qaraǵandy jáne Shymkent qalalarynda, sondaı-aq, Ońtústik Qazaqstan oblysynyń Aqsýkent aýylynda oralmandardy beıimdeý jáne ıntegratsııalaý ortalyǵy qyzmet etedi.

Ortalyqtarda iske asyrylatyn beıimdeý baǵdarlamalary quqyqtyq máseleler boıynsha keńester berýdi, memlekettik tildi jáne qalaýlary boıynsha orys tilin oqytýdy, kásibı daıarlaý, qaıta daıarlaý jáne biliktilikterin arttyrýdy qarastyrady, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti.