Qazaqstanǵa 15-ten astam el gýmanıtarlyq kómek kórsetti - Erjan Ashyqbaev

NUR-SULTAN. QazAqparat - Qazaqstanǵa álemniń 15-ten astam eli koronavırýspen kúres úshin gýmanıtarlyq júk jiberdi. Bul týraly Ortalyq kommýnıkatsııalar qyzmetindegi brıfıngte QR Syrtqy ister mınıstriniń orynbasary Erjan Ashyqbaev aıtty, dep habarlaıdy QazAqparat tilshisi.

«Syrtqy ister mınıstrligi Densaýlyq saqtaý mınıstrligimen birlesip, indet taraǵan kezden bastap syrtqy halyqaralyq áriptesterimizden tıisti qaıyrymdylyq kómekti elge jetkizý jumystaryn júrgizip keledi. Bul jumys óte aýqymdy. Árıne, osy oraıda eń aldymen áriptesterimiz - QHR, AQSh, Reseı, BAÁ, Japonııa, Túrkııa, Ońtústik Koreıa, Katar, Ózbekstan jáne kóptegen basqa da elderge, DSU sııaqty halyqaralyq uıymdarǵa, kompanııalarǵa, sheteldik qaıyrymdylyq qorlaryna, jekelegen azamattarǵa elimizge jasaǵan qaıyrymdylyq kómekteri úshin shynaıy rızashylyǵymyzdy jetkizgim keledi», - degen Erjan Ashyqbaev elimizge gýmanıtarlyq kómek kórsetken 15-ten astam memleket bar ekendigin naqtylaı tústi.

Osy rette QR SІM orynbasary gýmanıtarlyq kómekke baılanysty birneshe faktorlarǵa erekshe toqtalyp ótti.

«Birinshiden, indet jahandyq bolǵannan keıin biz jumysymyzdy, ıaǵnı, dári-dármek satyp alý nemese shetelden qajetti medıtsınalyq qurylǵylardy, zattardy ákelý máselesin dúnıejúzindegi úlken básekelestik jaǵdaıynda iske asyryp jatyrmyz. Sondyqtan muny eskergen jón. Ekinshiden, gýmanıtarlyq kómek qanshalyqty aýqymdy bolsa da, eń aldymen eń úlken júk Úkimetimizge, respýblıkalyq bıýdjetke túsip otyr. Biraq, eń úlken jaýapkershiligi júgi Densaýlyq saqtaý mınıstrligine, densaýlyq saqtaý júıesindegi áriptesterimizge túsip otyrǵany anyq», - dedi ol.

Onyń dereginshe, elimizge gýmanıtarlyq júk retinde 5 mln 200 myńǵa jýyq medıtsınalyq maska, 98 ókpeni jasandy jeldetý apparaty, 260 myń test júıesi, 3000 myńǵa jýyq teplovızor men termometr ákelindi.