Qazaqstandyqtarǵa WhatsApp arqyly nesıeler usynylýda - feık

ASTANA. QazAqparat - WhatsApp messendjerinde Qazaqstan azamattaryna nesıe berýge daıyn frantsýz ekonomıstiniń atynan habarlama tarady. Onymen baılanysyp, 1-9 mıllıon teńgege deıing alýǵa bolady. Bul – alaıaqtyq, dep habarlaıdy QazAqparat stopfake.kz saıtyna silteme jasap.

Mundaı aldaý joldary álem elderinde kóp taraǵan. Jelide nesıe usynatyn alaıaqtar týraly eskertýler bar jáne olardyń adamdardy qalaı kóndiretini egjeı-tegjeıli sıpattalǵan.

Ádette, shabýyldaýshylar áleýetti klıenttiń qyzyǵýshylyq tanytyp otyrǵanyn baıqap, odan nesıe rásimdeý úshin belgili bir mólsherde komıssııa tóleýin suraıdy.

Osydan keıin alaıaqtarmen baılanys úzilip, olardyń kómegine júgingen adam nesıe ala almaı, jibergen aqshasynan da aıyrylady.

2018 jyldyń birinshi jartyjyldyǵynda Sıngapýrdyń 315 turǵyny messendjerler men áleýmettik jeliler arqyly nesıe alýǵa ýáde bergen alaıaqtardyń qurbany bolǵan. Qylmyskerlerdiń qurbandary joǵaltqan aqshanyń jalpy somasy 670 000 dollardy qurady. 2019 jyly aldanyp qalǵan sıngapýrlyqtardyń sany 692-ge deıin ósti, al shyǵyn 2,2 mıllıon dollardy qurady. Sonymen qatar jaǵdaılardyń birinde alaıaqtar «komıssııa jarnasy» retinde segiz myń dollardan astam aqsha talap etken.

Sondaı-aq BAQ-ta «jarna» tóleýden bas tartqandarǵa qoqan-loqqy kórsetilip, qýdalaýǵa ushyraǵan, alaıaqtar olarmen áńgimelesý barysynda ıemdenip alǵan jeke derekterdi jarııalaımyz dep qorqytqany habarlandy.

Demek, messendjerlerde nemese áleýmettik jelilerde iri kólemde nesıeler usynǵan adamdarǵa múldem senýge bolmaıdy. Ádette, mundaı nesıe berýshiler alaıaqtar bolyp tabylady.