Qazaqstandyqtarǵa shetelde vaktsına alýyna bola ma

NUR-SULTAN. QazAqparat – Qazaqstan azamaty shetelde koronavırýsqa qarsy vaktsına alýyna bola ma? Jáne sheteldik vaktsına pasporty Qazaqstanda jaramdy ma? Bul suraqqa QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova jaýap berdi, dep habarlaıdy QazAqparat tilshisi.

«Vaktsına alǵannan keıin 6 aıdan soń koronavırýs ınfektsııasyna qarsy revaktsına alýǵa ruqsat. Búgingi kúnge 1 mln 200 myń adam revaktsınatsııadan ótti. Elimizde «Pfizer» vaktsınasynyń 2,5 mln astam dozasy bar. Jaramdylyq merizimi – 9 aı. Búgingi kúnge deıin birinshi komponent 564 myńnan astam adamǵa, ekinshi kompanent 300 myńnan astam adamǵa egildi», - dedi Aıjan Esmaǵambetova OKQ-de onlaın ótken baspasóz máslıhatynda.

Sondaı-aq, komıtet basshysy «Qazaqstandyqtarǵa shetelde vaktsına alýǵa bola ma?» degen saýalǵa jaýap berdi.

«Azamattardyń vaktsına alýy óz erkinde jáne ony qaıdan alatynynda ózi sheshedi. Bul týraly elimizde koronavırýsqa qarsy vaktsına alý naýqany bastalǵan sátte aıtqan bolatynbyz. Eger qazaqstandyq azamat shetelden vaktsına alsa, onyń pasportyn kórsetedi. Jáne ol pasport bizdiń aqparattyq júıege azamat vaktsına alǵan bolyp tirkeledi», - deıdi ol.