Qazaqstandyqtarǵa shaǵyn lıtrajdy kólikterge aýysý usynylyp otyr
«Shaǵyn lıtrajdy avtokólikterge kóshý, álbette, aýanyń tazarýyna aıtarlyqtaı áser etedi. Sonymen birge, adamdardyń kólik minýge kelgende tanym-túsinigin ózgertýge tyrysý kerek. ıAǵnı, qorshaǵan ortanyń qamy úshin azamattarǵa shaǵyn lıtrajdy avto satyp alýdyń artyqshylyqtaryn túsindirgen jón», - dedi Valts Vılnıtıs elordada qorshaǵan ortany qorǵaý men aýa sapasyn basqarýǵa arnalǵan jıynda.
Onyń aıtýnysha, kólik tańdaýǵa kelgende Eýropada salyq salý ádistemesi arqyly másele birshama sheshilgen.
«Kári qurlyqtyń birqatar elinde avtokólikterge salynatyn salyqtyń mólsheri tym joǵary. Onyń ústine, salyq mólsheri qozǵaltqyshtyń kólemi men aýa shyǵarylatyn zııandy zattarǵa baılanysty bolady. Nelikten Eýropada shaǵyn lıtrajdy kólikter suranysqa ıe dep oılaısyzdar? Birinshiden, ol kólikter úshin janar-jaǵarmaı arzan, aktsız tómen. Ekinshiden, ol jaqtaǵy joldardyń sapasy osy shaǵyn kóliktermen júrýge múmkindik beredi. Úshinshiden, ol jaqta avtokólik turaǵynyń aqysy tym joǵary. Sol sebepti iri gabarıtti kólikpen qınalǵansha, shaǵyn kólikpen turaqqa ornalasý ońaıyraq», - deıdi WECOOP jobalaý toptamasynyń jetekshisi.
Valts Vılnıtıs atalmysh máselege kelgende Baltyq elderinde jaǵdaı basqa ekenin alǵa tartady.
«Bizdiń elde de (Latvııa) azamattar iri kóliktermen júredi. Sebebi, bizde joldardyń jartysy topyraqty ári asfalt ta minsiz emes. Sonymen birge, Latvııada benzın baǵasy Qazaqstanǵa qaraǵanda joǵary. Dese de, benzın baǵasy jıi aýysyp turady», - deıdi ol.
Aıta ketsek, elordada Qazaqstan mınıstrlikteri men ónerkásip salasyndaǵy kásiporyndardyń ókilderi Eýropalyq Odaqtyń tájirıbesimen tanysyp, aýa sapasyn basqarý negizderi boıynsha bilim-bilikterin shyńdap jatyr. Oqytý Eýropalyq Odaqtyń qarjylandyrýymen jáne Qazaqstanǵa aýa sapasyn basqarý, oǵan taldaý júrgizý júıesin jetildirýge járdemdesý maqsatynda uıymdastyrylyp otyr.