Qazaqstandyqtarǵa salynǵan vaktsınany halyqaralyq taný sertıfıkatyn alý jumysy júrgizilýde

NUR-SULTAN. QazAqparat – Qazaqstandyqtar alyp jatqan vaktsınalardy halyqaralyq taný sertıfıkatyn alý baǵytynda jumys júrgizilip jatyr. Bul týraly QR DSM Qoǵamdyq densaýlyq saqtaý ulttyq ortalyǵynyń basqarma tóraǵasynyń orynbasary Aınagúl Qýatbaeva aıtty, dep habarlaıdy QazAqparat tilshisi.

«Qajylyqqa saparlaý merziminiń jaqyndaýyna baılanysty vaktsınatsııa ózekti másele dep esepteımiz. Osyǵan oraı Densaýlyq saqtaý mınıstrligi, ózge de memlekettik organdarmen birlesip, sonymen qatar Dúnıejúzilik densaýlyq saqtaý uıymymen aqyldasa otyryp, Qazaqstanda jasalǵan vaktsınany ózge elderde de rastaıtyn sertıfıkatty qabyldaý máselesine qatysty óte belsendi jumys júrgizip jatyr. Búginde Mońǵolııamen mundaı jumys óte tyǵyz júrgizilý ústinde ekendigin atap ótýge bolady», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe bul bir kúnniń ishinde sheshile salatyn másele emes.

«Menińshe, qajylyqqa barý naýqany uıymdastyrylǵanǵa deıin bul máselege qatysty naqty jaýap alamyz dep oılaımyn. Bul rette qazaqstandyqtarǵa ekpe jasalyp jatqan vaktsınalardy dáleldeıtin sertıfıkattardy taný jaıynda aıtyp otyrmyn»,- dedi Aınagúl Qýatbaeva.