Qazaqstandyqtarǵa psıhologııalyq qoldaý kórsetetin biryńǵaı Call-ortalyq qurylady

NUR-SULTAN. QazAqparat – Medıtsınalyq-áleýmettik kómekke muqtaj qazaqstandyqtarǵa konsýltatsııalyq, psıhologııalyq qoldaý kórsetý úshin biryńǵaı Call-ortalyq qurylady. Bul týraly QR Densaýlyq saqtaý mınıstrliginiń shtattan tys bas psıhıatr-narkology Qýanysh Altynbekov aıtty, dep habarlaıdy QazAqparat tilshisi.

«Ókinishke oraı «Ońaltý bólimsheleri qaı jerde jumys isteıdi, kómekti qalaı alýǵa bolady, bul bólimshelerge qalaı barýǵa bolady?» degen aqparatty halyq bile bermeıdi. Atalǵan Call-ortalyq elimizdiń barlyq psıhıkalyq densaýlyq ortalyqtaryn biriktiretin bolady«,- dedi Qýanysh Altynbekov Ortalyq kommýnıkatsııalar qyzmetinde ótken baspasóz máslıhatynda.

Sondaı-aq onyń aıtýynsha, elimizde óńirlik psıhıkalyq densaýlyq ortalyqtary bar. Olarda esirtkige táýeldi patsıentterdi medıtsınalyq-áleýmettik ońaltýdyń úsh kezeńdik baǵdarlamasymen emdeıtin bólimsheler jumys isteıdi. Qazirgi ýaqytta osy bólimshelerdi keńeıtý jumystary júrgizilip jatyr. Olarda esirtkige táýeldilikten arylýǵa, áleýmettik daǵdylardy qalpyna keltirýge, sondaı-aq esirtkini qaıta paıdalanýǵa tózimdilikti qamtamasyz etetin jeke qasıetterdi damytýǵa baǵyttalǵan medıtsınalyq jáne áleýmettik is-sharalar júrgiziledi.

Búgingi tańda úsh kezeńdi ońaltý 7 óńirde jumys isteıdi: Aqmola, Qostanaı, Pavlodar, Túrkistan, Aqtóbe oblystarynda jáne Nur-Sultan, Shymkent qalalarynda. Barlyq kómek tegin medıtsınalyq kómektiń kepildik berilgen kólemi aıasynda kórsetiledi.

»Qazan aıynda Soltústik Qazaqstan oblysynyń psıhıkalyq densaýlyq ortalyǵynda bólim ashylady. Osy jyldyń sońyna deıin basqa óńirlerde osyndaı bólimshelerdiń ashylatyndyǵy josparlanǵan«, - dedi ol.